Salomatligimiz o‘z qo‘limizda!
19.01.2022, 11:45
Zangiota-2 maxsus kasalxonasi direktori Doniyor Mirazimov Toshkent shahri va viloyati aholisiga videomurojaat bilan chiqdi. U keyingi paytda shifoxonaga keluvchilar ko‘payib ketganini aytib, yurtdoshlarimizni ehtiyotkorlikka chaqirdi.
Gap shundaki, mazkur shifoxona COVID-19 xastaligi og‘ir kechayotgan bemorlarni davolashga ixtisoslashgan. Aksariyat keluvchilarning maqsadi esa koronavirusga ekspress-test topshirish, o‘zida kasallik bor-yo‘qligini aniqlashdir. “Kasalxonamizga oddiy shamollash bilan kelib, “omikron” yuqtirib ketishingiz ehtimoli katta”, dedi shifokor.
Ustiga-ustak, test topshiruvchilar kasalxonaga o‘z yaqinlari, tanishlari hamrohligida kelyapti, bu esa odamlar to‘planishiga sabab bo‘lyapti. Ya’ni, virusning tez tarqalishi xavfi oshyapti.
Darhaqiqat, kuchli zarurat tug‘ilmasa, maxsus kasalxonalarga bormagan ma’qul. D.Mirazimov ta’kidlaganidek, test topshirish uchun tumanlardagi ixtisoslashgan poliklinikalar va sanitar-epidemiologik xizmatlar bo‘linmalariga murojaat qilish maqsadga muvofiq.
Ehtiyotkorlik oson, keyingi pushaymon esa og‘ir yumush, deydi donishmandlar. Nafaqat o‘zimiz, balki yaqinlarimiz, do‘stlarimiz, hamkasblarimiz taqdirini ham o‘ylab ish tutishimiz kerak.
Albatta, kasallikni davolagandan, uning oldini olgan afzal. Hali emlanmaganlar zudlik bilan vaksina olishi lozim. Koronavirus kasalligi oldini olishning eng maqbul yo‘li – shu, hozircha. Davlatimiz, hukumatimiz sinovlardan o‘tgan, samaradorligi isbotlangan vaksinalarni xorijdan katta pulga sotib olib, ularni bepul qabul qilishimiz uchun hamma shart-sharoitni yaratib berdi. Vaholanki, ayrim davlatlarning bunday ishlarga qurbi yetmayapti.
G’amxo‘rliklarga munosib tarzda ish tutaylik! Salomatligimiz o‘z qo‘limizda!
Mavluda Ibragimova,
Oliy Majlis Qonunchilik palatasi deputati,
O’zLiDeP fraksiyasi a’zosi
O'xshash yangiliklar
-
Davlat dasturidan kelib chiqadigan partiya va fraksiya oldidagi vazifalar muhokama qilindi
26.02.2024, 21:34
-
Deputat maktab kutubxonasiga 100 dan ortiq badiiy asarlar va adabiyotlar tuhfa qildi
14.02.2024, 17:25
-
Muhim va ustuvor vazifalar belgilab olindi
31.01.2024, 17:53
-
“Ayollar daftari” bilan manzilli ishlashning shaffof mexanizmi yaratiladi
30.01.2024, 12:29
-
Deputat jarqo‘rg‘onlik tadbirkorlar muammosini o‘rgandi
30.01.2024, 10:11
Fikringizni qoldiring