Qoraqalpog‘iston Respublikasining To‘rtko‘l tumanidagi “O’zbekiston” ovul fuqarolar yig‘ini tumandagi eng yirik mahallalardan biri sanaladi. Mazkur mahallada 3 ming 504 ta tomorqa xonadonlari mavjud bo‘lib, tomorqachilar asosan  sabzavotchilik bilan shug‘ullanadi.

E’tiborli tomoni tomorqalarida yetishtirilayotgan sabzavotlar ichki bozordan tashqari Buxoro va Xorazm viloyatlariga, qo‘shni Qozog‘iston Respublikasiga ham eksport qilinmoqda. 

O’zbekiston fermer, dehqon xo‘jaliklari va tomorqa yer egalari Kengashi hamda O’zLiDeP Siyosiy Kengashi Ijroiya qo‘mitasi raisi Aktam Xaitov boshchiligidagi ishchi guruh mazkur ovul fuqarolar yig‘inida istiqomat qiluvchi aholi xonadonlaridagi tomorqalari ko‘zdan kechirildi.

Ishchi guruh vakillari O’rinboy aka Radjapovning xonadoniga tashrif buyurdi. Xonadon egasining ixcham issiqxonasida yetishtirilayotgan pomidor, bodring, bulg‘or qalampiri ko‘chatlarini yetishtirish jarayoni bilan yaqindan tanishishdi, oilaning bugungi kundagi daromadi va faoliyatini yanada kengaytirish  borasida maslahat va tavsiyalari  berildi.  

O’rganishlar davomida ushbu hududda “Biogomus” ishlab chiqaruvchi “To‘rtko‘lli xasan-xusan” MChJ faoliyati bilan tanishildi. Tadbirkorga o‘z ishini  yanada  rivojlantirish uchun Kengash huzuridagi jamg‘arma hisobidan 300 mln so‘m miqdorida imtiyozli kredit ajratiladigan bo‘ldi.  

O’rganish  ishlari  davomida  ishchi  guruh a’zolari yana bir xonadon egasi Nasiba opa Matyaqubovaning tomarqasini ko‘zdan kechirdi. Uy oldi tomorqasini shudgorlash va ko‘chat ekish uchun ehtiyoj borligi  aniqlanib,  shu joyning o‘zida yer shudgorlab berildi, “Yashil makon” umummilliy loyihasi doirasida uzum va mevali ko‘chatlar o‘tqazildi.

Ishchi guruh vakillarining keyingi manzili Ellikqal’a tumanidagi   “Tozabog‘” OFY hududidagi “Navbahor” mahallasi bo‘lib, “EL AGRO TAMORQA CLUSTER” MChJ faoliyati bilan ham tanishdi. Shuningdek, ushbu mahallada o‘z tomorqasini qarovsiz holga tashlab qo‘yilgan xonadon sohiblari bilan suhbatlashildi. Xonadon egalariga yerni shudgorlash va ekin ekishda ko‘maklashildi.  

“Paxtachi” mahallasidagi na’munali xonadon egasi Ro‘zimbetov Sa’dullaning tomorqasini ko‘zdan kechirishdi. 22 sotixlik tomorqasining 10 sotixida  issiqxona qurilgan bo‘lib, limon, sabzavot, ko‘katlar  ekilgan. Bundan tashqari intensiv usulda baliqchilikni ham yo‘lga qo‘ygan, bir yillik daromadi o‘rtacha 300 mln so‘mni tashkil qiladi. Shuningdek, tomorqa yerida biogomus kaliforniya chuvalchanglarini ham yetishtirayotganligini guvohi bo‘lishdi.

 Yana bir xonadon egasi Anvar Ro‘zimbetov ham 30 sotixlik  tomorqasining 15 sotixida  issiqxonasi  mavjud. Aktam Xaitov boshchiligidagi ishchi guruh vakillari issiqxona faoliyatini ko‘zdan kechirdi. Xonadon egasi tomorqadan olayotgan daromadi yiliga 60-70 mln so‘mni tashkil qiladi.

Anvar  Ro‘zimbetovning tomorqasida har xil sabzavotlar ekilgan bo‘lib, shu yerning o‘zida ko‘rgazmali seminar tashkil qilindi. Tumanda faoliyat yuritayotgan «Tomorqa xizmati» MChJlarning aholi bilan birgalikdagi ishlari to‘g‘risida tavsiyalar berildi.

 O’zLiDeP Qoraqalpog‘iston Respublikasi

Kengashi matbuot xizmati