O‘zLiDeP Andijon shahar Kengashi tomonidan “Ishbilarmon ayol” ko‘rik-tanlovining shahar bosqichi o‘tkazildi. Unda hududdagi 15 nafar faol ishbilarmon va tadbirkor xotin-qizlar ishtirok etdi.

Tanlovda ishtirokchilar o‘zining ishlab chiqargan mahsulotlari, ayollar, kelinlar va bolalar liboslari, zardo‘zlik, hunarmandlik buyumlari va qandolatchilik mahsulotlari ko‘rgazmasini namoyish etdi. O‘zLiDeP Andijon viloyat Kengashi raisi, xalq deputatlari viloyat Kengashi deputati Xurshidaxon Xalilova boshchiligidagi hakamlar hay’ati esa ularni tanlov shartlariga muvofiq tarzda baholab borishdi.

-Bugungi tanlovda oilaviy korxonamizda tayyorlanayotgan qandolat mahsulotlari bilan qatnashib, faxrli 1-o‘rinni qo‘lga kiritdim, - deydi tadbirkor Saodatxon Ostonova. - Tanlovninig viloyat bosqichida ham munosib tayyorgarlik ko‘rib, unda ham g‘olib bo‘lishga astoydil harakat qilaman. 

Hakamlar hay’atining xulosasiga ko‘ra, yakka tartibdagi tadbirkor, qandolatchi Saodatxon Ostonova 1-o‘rinni egallab, ko‘rik-tanlovning viloyat bosqichiga yo‘llanmani qo‘lga kiritdi.

Tanlovda shuningdek, “Zamonaviy tadbirkor ayol”, “Yilning muruvvatli ishbilarmon ayoli”, “Bitiruvchi qizlarga eng ko‘p ish o‘rni yaratgan ishbilarmon ayol” hamda “Tashabbuskor ayol” nominatsiyalari  bo‘yicha g‘oliblar aniqlanib, partiyaning diplom va esdalik sovg‘alari bilan taqdirlandi.

Jahongir Djiyanov,

O‘zLiDeP Andijon shahar  Kengashi

apparat rahbari