Elektorat manfaatiga mos “yo‘l xaritasi”

08.09.2022, 17:29

Elektorat manfaatiga mos “yo‘l xaritasi”

Avval xabar berganimizdek, O‘zLiDeP Siyosiy Kengashi Ijroiya qo‘mitasi, Oliy Majlis Qonunchilik palatasidagi fraksiyasi hamda hududiy partiya tashkilotlari mutasaddilari ishtirokidagi kengaytirilgan yig‘ilishda Prezidentimizning tadbirkorlar bilan o‘tkazgan uchrashuvi yakunlaridan kelib chiquvchi dolzarb vazifalar atroflicha muhokama etilib, bu boradagi ishlarni amalga oshirish bo‘yicha kompleks chora-tadbirlar dasturi qabul qilingandi.

Davlatimiz rahbari tomonidan imzolangan “O’zbekiston Respublikasi Prezidentining tadbirkorlar bilan 2022 yildagi “Ochiq muloqoti”da belgilangan vazifalarni amalga oshirish chora­tadbirlari to‘g‘risida”gi qaror bilan tasdiqlangan “Yo‘l xaritasi”da belgilangan bir nechta yo‘nalishlar partiyaviy maqsadlarga hamohangligi bilan diqqatga sazovor.

Masalan, tadbirkorlik sub’ektlarini toifalarga ajratish va ularni qo‘llab­quvvatlash bo‘yicha manzilli ishlashni olasizmi yoki ishbilarmonlik faoliyatini kengaytirish va yangi loyihalarni amalga oshirish uchun qulay moliyalashtirish tizimini yaratishni olasizmi – barchasi O‘zLiDeP elektorati manfaatlariga mos keladi. Bundan tashqari, tadbirkorlar uchun yetarli shart­sharoit, infratuzilma va kafolatli bozor yaratish, mol­mulkni haqiqiy bozor aktiviga aylantirish, biznes sub’ektlarini nazorat qilish va ularni javobgarlikka tortishni erkinlashtirish mexanizmlari aniq belgilab berilgani partiyadoshlarimiz uchun ayni muddao bo‘ldi.

Shu munosabat bilan kuni kecha yuqoridagi muhim qarorda belgilangan vazifalarni atroflicha o‘rganish maqsadida O‘zLiDePning hududiy va tuman (shahar) kengashlari xodimlari, mahalliy kengashlar deputatlari va BPT raislari uchun tashkil etilgan o‘quv­seminarning birinchi bosqichi o‘tkazildi.

Unda ushbu hujjatda qayd etilgan yo‘nalishlarni O’zbekiston Liberal­demokratik partiyasi tomonidan amalga oshirish yuzasidan hamda hududiy partiya tashkilotlarining 2022 yilga mo‘ljallangan ish rejalariga kiritiladigan vazifalar va tavsiyalar haqida ma’lumot berildi.

Tadbirda Oliy Majlis Qonunchilik palatasi deputatlari, tegishli vazirlik va idoralarning mutasaddilari bilan bir qatorda O’zbekiston Respublikasi Prezidenti huzuridagi Tadbirkorlikni qo‘llab­quvvatlash bo‘yicha jamoatchilik kengashi a’zolari ham ishtirok etdilar. Jumladan, “Korzinka.uz” supermarketlar tarmog‘i asoschisi, TEAM universitetining ta’sischi aksiyadori Zafar Hoshimovning taklif va tavsiyalari keng muhokama qilindi.

Hududiy kengashlardagi deputatlarimizning e’tirofiga ko‘ra, har bir viloyatda “Tadbirkorlar xiyoboni”ni barpo qilish, unda “Farovonlik bunyodkorlari” deb nomlanuvchi ko‘rgazmalarning namoyish qilinishi, “O’zbekistonda xizmat ko‘rsatgan tadbirkor” unvonining ta’sis etilishi va boshqa qator o‘zgarishlar, yaratilayotgan imkoniyatlaru berilayotgan imtiyozlar partiya elektoratiga yangi qanot bag‘ishlaydi.

Ushbu o‘quv­seminarning navbatdagi bosqichlari “O’zbekiston Respublikasi Prezidentining tadbirkorlar bilan 2022 yildagi “Ochiq muloqoti”da belgilangan vazifalarni amalga oshirish chora­tadbirlari to‘g‘risida”gi qarorda belgilangan vazifalar ijrosi hamda Tadbirkorlik kodeksi loyihasining muhokamasiga bag‘ishlab o‘tkazilishi rejalashtirilgan.

Nasimjon ALIMOV,

O‘zLiDeP Siyosiy ta’lim markazi rahbari

Teglar
STM
  • Ko'rildi
    138
  • Chop etish
  • Do'stlar bilan ulashish
← Orqaga qaytish

Fikringizni qoldiring

+