Oliy Majlis Qonunchilik palatasi Spikeri o‘rinbosari, O’zLiDeP fraksiyasi rahbari, O’zbekiston fermer, dehqon xo‘jaliklari va tomorqa yer egalari Kengashi raisi Aktam Xaitov Qoraqalpog‘iston Respublikasida tadbirkorlik sub’ektlari, klasterlar, tomorqachilar faoliyati bilan yaqin tanishmoqda.

Partiya yetakchisi Nukus shahridagi “Muratbek mebel” mas’uliyati cheklangan jamiyati faoliyatini ko‘zdan kechirdi. 

2009 yilda tashkil qilingan mazkur korxonada kesish, tayyorlash va qayta ishlash, yig‘ish, yumshoq mebellar sexi, temir ustoxonasi, buyoq va yig‘ish sexlari mavjud bo‘lib, u yerda 50 nafardan ziyod kishining bandligi ta’minlangan.

Barcha buyurtmalar shu sexlardagi stanoklar yordamida tayyorlanib, tayyor bo‘lgan mahsulotlar namlik temperaturaga javob beradigan joylarda saqlanadi.

Bugun ichki bozorda mazkur korxona o‘z xaridoriga ega bo‘ldi. Nukuslik Muratbek Tanirbergenov tadbirkorlikni zamon bilan teng boshqaradi. Biznesni va tadbirkorlikni erkin boshqarishda marketing strategiyani terang bilishga to‘g‘ri keldi. Chunki marketing strategiya -  biznesni, bozorni  va xaridorni ushlab turishning birdan-bir tartibi hisoblanadi.   

Spiker o‘rinbosari ushbu korxona faoliyati bilan yaqindan tanishar ekan, unda ishlayotgan ishchi xodimlar uchun yaratilgan sharoitlar,  mahsulot  sifati va xaridorbopligi, tadbirkorning muammo va takliflari bilan qiziqdi.

Suhbat va muloqotlar chog‘ida partiya rahbari bunday korxonalarning tashkil qilinishi, birinchi navbatda aholining bandligini ta’minlashda muhim ahamiyatga ega ekanligini ta’kidlab o‘tdi.

O’zLiDeP Qoraqalpog‘iston Respublikasi

Kengashi matbuot xizmati