O’zLiDeP Qashqadaryo viloyat kengashi “Ayollar qanoti” tomonidan “Bunyodkor oila” loyihasi doirasida “Obodon” MFYda o‘z faoliyatini boshlagan tadbirkor ayol Sabo Shoqulovaning tikuvchilik sexida mahallada istiqomat qilayotgan ishsiz xotin-qizlar uchun amaliyot saboqlari tashkil etildi. Tadbir ishtirokchilari ishbilarmon ayolning faoliyati bilan yaqindan tanishdilar.

Joriy yilning iyul oyida ish boshlagan Sabo Shoqulova hozirga qadar 10 nafar xotin - qizlarni ish bilan ta’minlagan. Tikuvchilik sexida o‘ttizga yaqin mahsulotlar tayyorlanadi. Ayni paytda 15 nafar yosh qizlarga tikuvchilik, zardo‘zlik, kashtachilik sirlari o‘rgatilmoqda.

Qiziqarli musohaba tarzida o‘tgan anjuman so‘ngida ishtirokchilarga Prezidentimizning “2022-2026 yillarga mo‘ljallangan yangi O’zbekistonning Taraqqiyot strategiyasi to‘g‘risida”gi Farmoni hamda “Inson qadrini ulug‘lash va faol mahalla yili” Davlat dasturi, partiya dasturi va Saylovoldi platformasida belgilangan xotin-qizlarning ijtimoiy-siyosiy faolligini oshirish, tadbirkorlikka yo‘naltirish orqali bandligini ta’minlash, ularga ko‘rsatiladigan tibbiy-ijtimoiy xizmatlar sifatini yaxshilash, sog‘lom turmush tarzini shakllantirish, oila institutini mustahkamlash borasida amalga oshirilayotgan keng ko‘lamli ishlar haqida batafsil ma’lumot berildi.

 O’zLiDeP Qashqadaryo viloyat kengashi

matbuot xizmati.