G’ijduvon tuman markazidagi “Dilkash” tantanalar maskanida Xalq deputatlari tuman Kengashi deputati, mehnat faxriysi Raxmad Maxmudovning tashabbusi hamda hududdagi saxovatpesha homiylar ko‘magida MFYlardagi kam ta’minlangan va ehtiyojmand oilalar farzandlaridan 50 nafarining sunnat to‘ylari o‘tkazildi.

Tantanada tuman rahbariyati, mahalliy Kengash deputatlari, keng jamoatchilik vakillari, to‘ybolalarning ota-onalari hozir bo‘ldilar.

To‘kin dasturxon atrofidagi mahalliy san’atkorlar va  ijrochi yoshlar tomonidan kuylangan dilrabo qo‘shiqlar, ijro etilgan jozibali raqslar barchaga xushnudlik baxsh etdi.

Bolajonlarga to‘y sarpolari kiydirilib, ularga homiy tashkilotlarning sovg‘a-salomlari ulashildi. Ayniqsa bolakaylar sevib tomosha qiladigan multfilm qahramonlari timsollari davraga o‘ziga xos shukuh bag‘ishladi.

Bunday bayramona tadbirlar va xalqimizning azaliy urf-odat va an’analari bolajonlar xotirasiga bir umrga muhrlanib qolishi turgan gap.