Kattaqo‘rg‘on  shahar hokimligida yangi tahrirdagi O’zbekiston Respublikasi Konstitutsiyasining tashviqotiga bag‘ishlangan tadbir tashkil etildi. 

Unda  Oliy Majlis Qonunchilik  palatasi va viloyat, tuman kengashlari deputatlari, O‘zLiDeP faollari, mahalla raislari, hokim yordamchilari, xotin-qizlar faollari, yoshlar yetakchilari, nuroniylar qatnashdi.

Tadbirda so‘z olgan Oliy Majlis Qonunchilik  palatasi deputati Vahobjon Murodqobilov yangi tahrirdagi Konstitutsiyaviy qonun loyihasining mazmun-mohiyati, yangi normalarning jamiyatimiz, shu jumladan, har bir insonga qay darajada muhimligi haqida atroflicha tushuntirib o‘tdi.

Xususan, har kim uy-joyli bo‘lish huquqiga ega. Hech kim sudning qarorisiz va qonunga nomuvofiq holda uy-joyidan mahrum etilishi mumkin emas. Uy-joyidan mahrum etilgan mulkdorga uy-joyning hamda u ko‘rgan zararlarning o‘rni qonunda nazarda tutilgan hollarda va tartibda oldindan hamda teng qiymatda qoplanishi ta’minlanadi. Davlat uy-joy qurilishini rag‘batlantiradi va uy-joyga bo‘lgan huquqning amalga oshirilishi uchun shart-sharoitlar yaratadi. Aholining ijtimoiy jihatdan ehtiyojmand toifalarini uy-joy bilan ta’minlash tartibi qonun bilan belgilanadi.

Tadbirda so‘z olganlar barchani yangi O’zbekiston taraqqiyoti uchun birlashishga, buning uchun esa referendumda faol qatnashishga chaqirdi.

Po‘lat Ergashev,

Oliy Majlis Qonunchilik palatasi

 deputati yordamchisi