Tadbirkorlar va ishbilarmonlar harakati – O’zbekiston Liberal-demokratik partiyasining XI syezdi bo‘lib o‘tdi

30.05.2023, 18:31

Tadbirkorlar va ishbilarmonlar harakati – O’zbekiston Liberal-demokratik partiyasining XI syezdi bo‘lib o‘tdi

Joriy yilning 30 may kuni Toshkent shahrida Tadbirkorlar va ishbilarmonlar harakati – O’zbekiston Liberal-demokratik partiyasining o‘n birinchi syezdi bo‘lib o‘tdi. Unda Qoraqalpog‘iston Respublikasi, viloyatlar va Toshkent shahridan saylangan hamda partiya Ustaviga ko‘ra Syezdning to‘g‘ridan-to‘g‘ri delegati hisoblanuvchi jami 633 ta delegat qatnashdi.

Syezdda shu yilning 9 iyul kuni bo‘lib o‘tadigan muddatidan ilgari O’zbekiston Respublikasi Prezidenti saylovida O`zLiDePning ishtiroki va saylovda partiyadan ko‘rsatiladigan nomzod masalasi muhokama qilindi.

Syezd qatnashchilari so‘nggi yillarda “Inson qadri uchun” tamoyili hamda “Avval inson, keyin – jamiyat va davlat” degan xalqchil g‘oya asosida xalqimizning farovonligi oshirilganligini, iqtisodiyot tarmoqlari transformatsiya qilinganligini va tadbirkorlik sohasi butunlay yangicha qiyofa kasb etganligini, inson huquqlari va manfaatlarini so‘zsiz ta’minlash hamda faol fuqarolik jamiyatini shakllantirish yo‘lida izchil islohotlar amalga oshirilib kelinayotganligini ta’kidladilar.

O’tgan davr davlatimiz uchun Harakatlar strategiyasi hamda uning mantiqiy davomi hisoblangan Yangi O’zbekistonning Taraqqiyot strategiyasi doirasida jamiyat hayotining barcha jabhalarini qamrab olgan tarixiy islohotlar, tub burilishlar davri bo‘lganligiga alohida e’tibor qaratildi.

Syezd ishtirokchilari tomonidan har tomonlama o‘zini oqlagan mazkur islohotlarning davomiyligini ta’minlash mamlakatdagi millionlab fuqarolarning hoxish-istaklarini va manfaatlarini ifodalovchi yetakchi siyosiy kuch hisoblangan O‘zLiDePning asosiy vazifasi ekanligi ta’kidlandi.

Yangi tahrirdagi Konstitutsiya qabul qilinishini munosabati bilan shakllanayotgan yangicha konstitutsiyaviy-huquqiy sharoitlarda Konstitutsiyadan kelib chiqadigan davlatning fuqarolar oldidagi yangi ijtimoiy-iqtisodiy majburiyatlarini to‘laqonli va sifatli bajarilishini ta’minlashga, ushbu mas’uliyatli vazifani yurtimizda boshlangan va orqaga qaytmaydigan darajada shiddatli tus olgan islohotlar bilan hamohang tarzda amalga oshirishga hamda taraqqiy etgan davlat – Yangi O’zbekistonni qurish ulug‘vor g‘oyasi atrofida butun jamiyatimizni, xalqimizni jipslashtirishga qodir bo‘lgan, Vatan taqdirini o‘zidan ustun qo‘yib, hamisha xalq dardi bilan yashaydigan, jonkuyar shaxs nomzodini partiya nomidan ilgari surish zarurligi alohida qayd etildi.

Ushbu barcha jihat va ezgu fazilatlar o‘zining butun umrini Vatanimiz, xalqimiz taraqqiyoti va farovonligiga baxshida etib kelayotgan, adolatli va xalqchil boshqaruvi bilan yurtdoshlarimizning mehrini qozonib, Yangi O’zbekistonni barpo etayotgan Shavkat Miromonovich Mirziyoyevga tegishli ekanligi ta’kidlanib, aynan uning nomzodini bo‘lajak saylovda partiya nomidan ko‘rsatish to‘g‘risida O’zbekiston Liberal-demokratik partiyasi Syezdi delegatlari tomonidan yakdillik bilan qaror qabul qilindi.

Ta’kidlanganidek, so‘nggi yillarda mamlakatimizda barcha sohalarda Davlat rahbari boshchiligida mislsiz o‘zgarishlar yuz berdi. Jamiyatimizning siyosiy-huquqiy, ijtimoiy-iqtisodiy qiyofasi o‘zgarib, hayotimizda yangicha munosabatlar, yangi imkoniyat va qadriyatlar shakllanayotgani e’tirof etildi. Ayniqsa, inson huquq va erkinliklari, qonun ustuvorligi, ochiqlik va oshkoralik, so‘z erkinligi, din va e’tiqod erkinligi, jamoatchilik nazorati, gender tenglik, xususiy mulk daxlsizligi, iqtisodiy faoliyat erkinligi singari demokratik tushunchalar va hayotiy ko‘nikmalar hozirgi vaqtda real voqelikka aylanganligi qayd etildi.

Qolaversa, yig‘ilishda iqtisodiyotimizda haqiqiy bozor munosabatlarini joriy etish, shu asosda mamlakatimizni taraqqiy ettirish uchun tadbirkorlarga barcha shart-sharoitlar yaratib berilayotgani e’tirof etildi.

Shuningdek, bugungi kunda butun davlat apparati Davlat rahbari tomonidan ilgari surilgan “xalqimiz ertaga emas, o‘zoq kelajakda emas, bugun hayotidan rozi va mamnun bo‘lib yashashi kerak” degan g‘oya asosida jamiyat rivoji va farovonligi yo‘lida faoliyat olib borayotganligi qayd etildi.

Ushbu hayotbaxsh yangilanishlar, o‘zgarishlar amaldagi Prezident tashabbusi, sa’y-harakatlari bilan amalga oshirilayotganligi va ana shu ijobiy o‘zgarishlarni o‘zining hayotida his qilgan millionlab O’zbekiston fuqarolari islohotlar aynan Shavkat Miromonovich Mirziyoyev boshchiligida izchil davom etishini istayotganligi bildirildi.

Syezdda O’zbekiston Respublikasi Prezidenti lavozimiga nomzod Sh.M.Mirziyoyev o‘z dasturining asosiy yo‘nalishlari haqida ma’ruza qildi.

Dastur beshta maqsadni qamrab olgan bo‘lib, birinchi maqsad – “har bir insonga o‘z salohiyatini ro‘yobga chiqarish uchun munosib sharoit yaratish”dan iborat. Ushbu maqsadga erishish uchun maktabgacha va maktab ta’limini yuqori bosqichga olib chiqish bo‘yicha yangi dasturlarni amalga oshirish, 2030 yilgacha maktabgacha ta’limga bo‘lgan ehtiyojni to‘liq qoplab, qamrovni 100 foizga yetkazish, ehtiyojmand oilalar farzandlari uchun bog‘cha xarajatlarini davlat tomonidan to‘liq qoplab berish kabi takliflar ilgari surilmoqda.

Ushbu yo‘nalishda maktablarda qo‘shimcha 2,5 million o‘quvchi o‘rni yaratish, “Yiliga besh yuz ming o‘quvchi o‘rni” dasturini amalga oshirish, xususiy ta’limga qo‘shimcha yengilliklar berish, chekka hududlarda maktab avtobuslarini bepul yo‘lga qo‘yish, barcha tuman va shaharlarda “Iste’dod – Intilish – Istiqbol” maktab-internatlarini tashkil etish kabi muhim masalalar ham qamrab olingan.

Shu bilan birga o‘rtacha umr davomiyligini 73 yoshdan 78 yoshga yetkazish maqsadida sog‘liqni saqlash tizimidagi islohotlarni davom ettirish, “Gepatit S” kasalligini to‘liq davlat hisobidan davolash, aholiga “kafolatlangan tibbiy paket”ni bepul taqdim etish, o‘zak hujayralari transplantatsiyasini yo‘lga qo‘yilib, ehtiyojmand oilalar farzandlariga bunday muolaja xarajatlari davlat hisobidan to‘liq qoplab berish, sog‘liqni saqlash tizimini raqamlashtirish va tibbiy sug‘urta tizimini joriy qilish bo‘yicha takliflar partiya vakillari tomonidan mamnuniyat bilan qarshi olindi.

Shuningdek, nomzod tomonidan Ijtimoiy xizmatlar sohasini qayta ko‘rib chiqish, har bir mahallada professional ijtimoiy xodimlar faoliyatini yo‘lga qo‘yish, tumanlarda ijtimoiy xizmatlarni “yagona darcha” tamoyili asosida ko‘rsatadigan ijtimoiy himoya markazlarini tashkil etish, tug‘ruq ta’tilidagi ayollar uchun onlayn ishlash tizimi, nogironligi bo‘lgan shaxslarni qo‘llab-quvvatlash bo‘yicha yangi tizimni joriy etish hamda bu boradagi ishlarni muvofiqlashtirish maqsadida Ijtimoiy himoya milliy agentligini tashkil etish taklifi ilgari surildi.

Dasturdan tashqi mehnat migratsiyasi tizimini to‘liq isloh qilish, xorijga ishlash uchun borayotgan fuqarolarni kasbga va chet tillariga o‘qitish ko‘lamini kengaytirish, shuningdek, aholini arzon uy-joy bilan ta’minlash maqsadida qo‘shimcha 1 million xonadonli uy-joy qurish, quruvchilarga va xalqimizga arzon va uzoq muddatli kreditlar taqdim etish kabi masalalar o‘rin olgan.

Dasturning ikkinchi maqsadi – “Odamlarni hayotdan rozi qilish uchun barqaror iqtisodiy o‘sishni ta’minlash”dan iborat. Ushbu yo‘nalishda aholi jon boshiga yalpi ichki mahsulot hajmini hozirgi 2 ming 200 dollardan 4 ming dollarga oshirib, mamlakatimizni “daromadi o‘rtachadan yuqori bo‘lgan davlatlar” qatoriga kiritish, Jahon savdo tashkilotiga a’zo bo‘lish, Sanoatni rivojlantirish jamg‘armasini tashkil etish, eksport hajmini 2 barobarga oshirib, 45 milliard dollarga yetkazish kabi vazifalar belgilab olingan.

Mazkur yo‘nalishda qayta tiklanuvchi energiyadan keng foydalanishni jadallashtirish, xususan, qayta tiklanuvchi energiya manbalari 25 ming mega-vattga, ularning jami quvvatlardagi ulushini 14 foizdan 40 foizga yetkazish choralari nazarda tutilgan.

Dasturda barcha aholi punktlari toza ichimlik suvi bilan ta’minlash, barcha qishloq va mahallalarni Internet bilan to‘liq qamrab olish va Internet tezligini 10 karraga oshirish belgilangan.

Shuningdek, xususiy sektor ulushini oshirish, monopol sohalarni bozor tamoyillariga o‘tkazishni izchil davom ettirish, temir yo‘l xizmatlari, avtomobil yo‘llarini qurish va boshqarish, gaz va elektr yetkazib berishni xususiy sektorga o‘tkazish, davlat ulushi mavjud korxonalar soni 6 barobarga kamaytirish va iqtisodiyotda nodavlat sektor ulushini 85 foizga yetkazish masalalari nazarda tutilgan.

Dasturda tadbirkorlarni qo‘llab-quvvatlash, ularga erkin faoliyat yuritishi uchun qulay sharoitlar yaratish bo‘yicha ishlarni davom ettirish nazarda tutilgan. Xususan, biznes uchun qo‘shilgan qiymat, foyda, aylanma va mol-mulk soliq stavkalari oshirilmasligini qat’iy kafolatlash ko‘zda tutilmoqda.

Dasturning uchinchi maqsadi – “Suv resurslarini tejash va atrof muhitni muhofaza qilish”ga qaratilgan. Xususan, 2030 yilga qadar ekin maydonlarini to‘liq suv tejaydigan texnologiyalarga o‘tkazish, sohaga bozor mexanizmlarini olib kirish, suv tejaydigan texnologiyani joriy etgan fermer va dehqonlar uchun rag‘batlantirish mexanizmlarini yanada ko‘paytirish choralari ko‘riladi.

Shuningdek, Orolbo‘yi mintaqasidagi o‘rmonzorlarni kelgusi yetti yilda 1,6 mln dan 2,3 mln gektarga, respublikada ko‘kalamzorlik darajasini 30 foizga yetkazish, yangi uy-joy qurishda pudratchilarga “yashil hudud” va avtoturargoh bo‘lishi haqida talabni qo‘yish, aholini qattiq maishiy chiqindilarni to‘plash xizmatlari bilan 100 foiz qamrab olish nazarda tutilgan.

To‘rtinchi maqsad – “Qonun ustuvorligini ta’minlash, xalq xizmatidagi davlat boshqaruvini tashkil etish”dan iborat. Bu borada davlat xizmatlarini to‘liq elektron shaklga o‘tkazish, ayrim soliqlarni bevosita mahallaga yo‘naltirish kabi choralar nazarda tutilmoqda.

Dasturda qonun ustuvorligi ta’minlash, sud mustaqilligi va odilligini oshirishga qaratilgan bir qator takliflar nazarda tutilgan. Xususan:

–sud-tergov jarayonlarida holislik va adolatni ta’minlash maqsadida tergovda huquqni cheklashga doir sanksiyalar alohida sudyalar tomonidan berilishi bo‘yicha tartibni o‘rnatish;

–fuqarolarni “qamoqqa olib tergov qilish” amaliyotini kamaytirish va buning o‘rniga garov ehtiyot chorasidan keng foydalanish imkoniyatini yaratish, shuningdek mazkur masalada sudlarga murojaat qilish imkoniyatlarini kengaytirish;

–jinoyat sodir qilgan shaxslarni ular kelgusida tuzalish yo‘liga o‘tishi uchun muqobil jazo turlarini kengaytirish, tadbirkorlar uchun jinoiy javobgarlikni yanada liberallashtirish hamda Biznes ombudsman va Savdo-sanoat palatasi tomonidan tadbirkorni tergov-sud jarayonida himoya qilish bo‘yicha yangi tizim joriy etish masalalari inobatga olingan.

Beshinchi maqsad – “Yangi O’zbekiston xavfsiz va tinchliksevar davlat”. Ushbu yo‘nalishda Markaziy Osiyoda turli yo‘nalishlar, ayniqsa, suv resurslaridan oqilona foydalanish, transport yo‘laklarini rivojlantirish borasidagi amaliy hamkorlik sifat jihatidan yangi bosqichga olib chiqish, xorijdagi vatandoshlarni qo‘llab-quvvatlab, yurtimiz taraqqiyotida faol ishtirok etishlari uchun ularga zarur shart-sharoitlarni yaratib berish bo‘yicha tizimli choralarni ko‘rish taklif etilmoqda.

Dasturda Qurolli Kuchlarimizning qudrati, mudofaa qobiliyati va harbiy salohiyatini yanada oshirish maqsadida Milliy armiyani 2030 yilga qadar eng zamonaviy qurol-aslaha va harbiy texnika bilan ta’minlash bo‘yicha tashabbuslar ilgari surilmoqda.

Syezd qaroriga ko‘ra O‘zLiDeP qonunda belgilangan tartibda O’zbekiston Respublikasi Prezidentligiga partiya nomzodini ro‘yxatga olishni so‘rab O’zbekiston Respublikasi Markaziy saylov komissiyasiga murojaat etadi.

Syezdda ko‘rib chiqilgan barcha masalalar yuzasidan tegishli qarorlar qabul qilindi.

O`zLiDeP matbuot xizmati

  • Ko'rildi
    754
  • Chop etish
  • Do'stlar bilan ulashish
← Orqaga qaytish

Fikringizni qoldiring

+