Nargizaxon Nazarova izboskanlik. U parrandachilik yo‘nalishida tadbirkorlikni yo‘lga qo‘yish istagida edi. Biroq... ayni vaqtda uning xafsalasi pir bo‘lganday. O‘zi yashayotgan “Oq oltin” mahallasi orqali allaqachon tovuq kataklar berilgan, ammo parrandaning o‘zidan darak yo‘q. Shunday bo‘lishiga qaramay, mutasaddi bank fuqaroga 5 million so‘m qarzdorlik chiqargan, undirilishi yuzasidan bo‘layotgan talabga esa Nargizaxon Nazarovaning boshi qotgan. Murojaatlariga befarq qarayotgan mutasaddilardan zada bo‘lgan fuqaro O’zLiDeP Andijon viloyat Kengashi tomonidan tashkil qilingan “Hududlarda yakka tartibdagi tadbirkorlik faoliyatini rivojlantirish istiqbollari” mavzusidagi amaliy muloqotga umid bilan keldi. O’zLiDeP deputatlik guruhi a’zolari, viloyat Davlat soliq boshqarmasi, Markaziy bank viloyat boshqarmasi, Respublika savdo-sanoat palatasi hududiy boshqarmasi, Davlat xizmatlari agentligi, qator banklar mutasaddilar va viloyatdagi yakka tartibda faoliyat yuritayotgan tadbirkorlar ishtirok etgan  mazkur tadbirda uning muammosi joyida hal etildi. N. Nazarovaning murojaati Markaziy bank tomonidan nazoratga olindi.

-2014 yilda yakka tartibdagi tadbirkor sifatida davlat ro‘yxatidan o‘tganman, - deydi xonobodlik Gulnozaxon ona Shokirova. – Ko‘rpa-to‘shak tayyorlab ichki bozorga ham buyurtma asosida aholiga yetkazib beraman. Faoliyatimni kengaytirish uchun bankka kredit olish maqsadida kerakli hujjatlarni topshirganimga ancha bo‘lgan. Biroq xaligacha bu borada menga ijobiy javob berilmadi.

Fuqaroning murojaati o‘z joyida Markaziy bank mutasaddisi tomonidan hal etildi.

Ravshanbek ABDURAHIMOV,

O‘zLiDeP Andijon viloyat Kengashi

huzuridagi STM rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!