Asakalik Qahramon Abduhalilov yakka tartibdagi tadbirkorlik faoliyati bilan shug‘ullanadi. Shu bilan birga, adabiyot shinavandasi bo‘lgan bu ishbilarmon bo‘sh vaqtida kitob mutolaa qilishni juda xo‘sh ko‘radi.

Partiya tuman kengashi tomonidan “O‘zLiDeP kutubxonalari” loyihasi doirasida tashkil etilgan tadbir uning ezgu maqsadini amalga oshirishi uchun ayni muddao bo‘ldi.

Tadbirkorning sa’y-harakati bilan tez fursatda tumandagi madaniyat va aholi dam olish markazida 2 ming kitob fondiga ega kutubxona foydalanishga topshirildi.

Kutubxonaning ochilish marosimi ham chinakam kitob bayramiga aylanib ketdi. Marosim avvalida tashkil etilgan kitob yarmarkasidan yoshu keksaning dili ravshan tortdi, ko‘pchilik o‘zi istagan mavzudagi kitoblarni arzon narxlarda xarid qildi.

–Kutubxona odamlarning sevimli maskaniga aylansa, yoshlarni yuksak ma’naviyatli insonlar etib tarbiyalashga xizmat qilsa, degan orzudaman, – deydi Q.Abduhalilov. – Kelgusida bu yerni kengaytirib kitobxonlar tanlovi, shoir-yozuvchilar bilan ijodiy uchrashuvlar kabi ma’naviy tadbirlar o‘tkazish niyatimiz ham bor.

Ta’kidlash kerak, yigit-qizlarni kitobxonlikka jalb qilish, ularni bo‘sh vaqtlarini mazmunli o‘tkazishlariga ko‘maklashish maqsadida tashkil etilgan ushbu kutubxona ayni damda yosh kitobxonlar bilan gavjum.

–Kelajakda shifokor bo‘lmoqchiman, – deydi tumandagi 10-umumta’lim maktabining 7-sinf o‘quvchisi Guljahon Ergasheva. – Maktabimiz yonida tashkil etilgan kutubxona bilim va malakalarimizni yanada oshirishda asqotadi. Endi bo‘sh vaqtimda shu yerga kelib, qo‘shimcha dars qilish, badiiy kitoblar o‘qiymiz.

 Boburmirzo HOJIAKBAROV,

O‘zLiDeP Asaka tuman

 kengashi apparat rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!