O‘zLiDeP Farg‘ona viloyat Kengashi Quva tumanidagi Xonobod qishlog‘ida sayyor qabul tashkil etdi.

Unda tumandagi 4 ta sektor vakillari, xalq deputatlari viloyat, tuman kengashidagi partiya deputatlik guruhi a’zolari hamda keng jamoatchilik vakillari ishtirok etdi.

Shu hududda yashovchi Rohila Rasulova chorvachilikni boshlash niyati borligini aytib, mutasaddilardan imtiyozli kredit olishda amaliy yordam so‘radi. Uning murojaati shu yerning o‘zida o‘rganilib, fuqaroga “Xalq bank” tuman filiali tomonidan 7 million so‘m miqdorida imtiyozli kredit ajratildi.

Shuningdek, qabul davomida aholi tomonidan bir necha yillardan buyon qishloqda qarovsiz qolgan eski binoni yosh bolalar uchun shinam va ko‘rkam bog‘chaga aylantirish taklifi o‘rtaga tashlandi.

Ushbu murojaatni xususiy tadbirkor Izzatillo Mo‘minov o‘z zimmasiga olib, xususiy maktabgacha ta’lim muassasasini qurib foydalanishga topshirmoqchi ekanini ma’lum qildi. Mutasaddilar shu yerning o‘zida mazkur binoni ajratib berdilar.

–Agar qishloqda xususiy maktabgacha ta’lim muassasasi qurib bitkazilsa eng avvalo, yosh avlod kamoli uchun katta hissa qo‘shgan bo‘lamiz, – deydi tuman maktabgacha ta’lim bo‘limi mudirasi Nargizaxon Mo‘ydinova. – Bundan tashqari, bu yerdagi qanchadan qancha ishsiz yoshlar, ayollar ish bilan ta’minlanib, oilaviy sharoiti yanada yaxshilanadi.

Sayyor qabul davomida fuqarolar o‘z murojaatlariga javob olarkan qishloqning muammolari yechilishiga katta ishonch bildirishdi.

Sh.TOLIPOVA,

O‘zLiDeP Farg‘ona viloyat Kengashi

 matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!