Tayloq tumani “Fayzobod” mahallasida o‘z tomorqasidan yaxshi daromad olib, ro‘zg‘orini to‘kin, turmushini obod qilayotgan omilkorlar ko‘p. Shu hududda yashovchi Erkin Rahimov ham 35 sotix yer maydoniga issiqxona tashkil etib, barakali hosil olib kelayotgan ishbilarmonlardan biri.

Ayni chog‘da u rahbarlik qilib kelayotgan “Erkin Rahimov boshliq fermer ho‘jaligi”da makkajo‘rining iste’molbop navi yetishtirilmoqda.

–Yurtimiz bozorlarida makkajo‘horining bu naviga talab katta, ularni bozorga erta chiqarsak, ko‘proq daromad ko‘ramiz, – deydi  E.Rahimov. –Shu boisdan bu ekinni issiqxonada yetishtirishni yo‘lga qo‘ydik. Hozirda issiqxonamizda 10 ga yaqin yoshlar mehnat qilmoqda. Makkajo‘horining o‘zidan yiliga 100 million so‘mga yaqin daromad qilamiz. Shukrki,  xonadonimiz obod, ro‘zg‘orimizda baraka bor.

Tumandagi “Tepaqishloq” mahallasida yashovchi  Shafoat aya Normatova ham 8 sotixlik yerda dehqonchilik  qilib, shu mehnati ortidan katta ro‘zg‘orini obod etib kelmoqda. Hozirda onaxonning tomorqasida kartoshkaning yangi navlari yetishtirilmoqda. Oila vakillari tomorqasidan yiliga 4-5 tonna  kartoshka olib, 15 million so‘m foyda ko‘rishni mo‘ljallayapti.

– Hovlidagi ekinlarning yashnab turishida mening hissam bor. Bolalarimga  ekin ekinglar, chopiq qilinglar, deb aytmasam qilishmaydi, – deydi Shafoat aya. – O‘zLiDeP faollarining uyimizga kelib, tomorqadan samarali foydalanish hamda issiqxona tashkil etish bo‘yicha bergan zarur ko‘rsatmalari yerga bo‘lgan mehrimizni yanada oshirdi. Kelgusida o‘z tomorqamizda issiqxona tashkil etib, qo‘shimcha daromad olish uchun ro‘zg‘orimizdan ortganini bozorga sotishni maqsad qilganmiz.

Ta’kidlash kerak, eng chekka hududlarga kirib borayotgan “O‘zLiDeP boshlang‘ich partiya tashkilotlari o‘z tomorqasida faoliyatini boshlaganlarga ko‘makdosh” loyihasi hududda tadbirkorlar safini yanada kengaytirishda yaxshi samara bermoqda. Loyiha doirasida partiya faollari tumandagi 6 xonadonda bo‘lib, xonadon egalariga tomorqadan samarali foydalanish bo‘yicha zarur tavsiyalar berdilar.

Shuningdek, O‘zLiDeP viloyat Kengashi vakillari loyiha doirasida   Oqdaryo tumanidagi  “O‘zbekiston” MFY dagi “Bolta” qishlog‘ida yashovchi  Orif Daminov  xonadonida bo‘ldilar.

– Har yili ro‘zg‘or uchun zarur pomidor, bodring yoki boshqa rezavorlarni tomorqamizda yetishtiramiz, – deydi Orif Daminov. –Birorta mahsulotni ham bozordan sotib olmaymiz, ortganini sotamiz.

Uchrashuvda partiya faollari tomonidan tomorqachiga faoliyatini kengaytirish uchun kredit olish, issiqxona tashkil qilsa, kuz, qish fasllarida ham qo‘shimcha daromad topishi mumkinligi haqida tushunchalar berildi.

Baxtigul QARShIYEVA,

O‘zLiDeP Samarqand viloyat Kengashi

matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!