Xalq deputatlari viloyat Kengashidagi O‘zLiDeP deputatlik guruhi a’zolari aholi, ayniqsa, tadbirkor va ishbilarmonlarni o‘ylantirib kelayotgan muammolarni hal etishga jiddiy bel bog‘lagan. Masalan, yaqinda partiya Navoiy viloyat Kengashi deputatlari tadbirkor Ilhom Sharipovga “Milliy bank” Malikrabot filialidan 200 million so‘m miqdorida imtiyozli kredit olishga ko‘maklashdi. 

Tadbirkor ushbu mablag‘ni ishlab chiqarish binosida kerakli uskunalar olishga sarfladi va Erondan turli jihozlarni olib kelib o‘rnatdi.  Natijada “Navoiy Yevro Stal” kichik korxonasi armatura ishlab chiqarishni yo‘lga qo‘ydi.

– Mahsulotlarimizdan qurilish sohasida panjaralar, shuningdek, issiqxonalar qurishda keng foydalansa bo‘ladi, – deydi korxona rahbari Ilhom Sharipov. – Shu bois ularni sifatli, pishiq qilib yasashga jiddiy e’tibor qaratmoqdamiz. Ayni chog‘da korxonamizda 12, 14, 16 va 18 mm diametrdagi armaturalar tayorlanyapti. Kelgusida ham rejalarimiz ko‘p. Konimex tumanida 480 ming dollarga Koreyadan texnologiya keltirib, bir gektar yerga issiqxona qurmoqchimiz.

Ta’kidlash kerak, bugun korxonada ishchi-xodimlar uchun ham barcha qulayliklar yaratilgan. Masalan, ishchilar uchun uch mahal issiq ovqat tayyorlanadi. Xodimlarning oylik maoshlari ham vaqtida beriladi. Eng muhimi, uzoqdan kelgan ishchilar uchun yotoqxona ham yaratilmoqda.

Q.ASTONOV,

O‘zLiDeP Navoiy viloyat Kengashi

 tashkiliy-partiyaviy

ishlar bo‘limi mudiri

O‘zLiDePning Facebook hamda Instagram'dagi rasmiy sahifasi va Telegram’dagi kanaliga a’zo bo‘lib, so‘nggi yangiliklardan xabardor bo‘ling!