Davlatimiz rahbarining joylarda amalga oshirilayotgan bunyodkorlik ishlari, yirik loyihalar bilan tanishish va xalq bilan muloqot qilish maqsadida viloyatimizga tashrifi yutuqlar bilan birga mavjud kamchiliklarni o‘z vaqtida bartaraf etish zarurligini ham ko‘rsatib berdi. Quvonarlisi, bu tashrif barcha farg‘onaliklar qalbida bugunidan shukronalik, ertangi kunga ishonch tuyg‘ularini yanada mustahkamladi.

Ta’kidlash  joiz, Prezidentimiz 2017 yil 22-23 iyun kunlari Farg‘ona viloyatiga tashrifi chog‘ida qurilish-bunyodkorlik ishlarini keng ko‘lamda davom ettirish, turizm, sanoat, qishloq xo‘jaligi, xizmat ko‘rsatish va servis sohalarini jadal rivojlantirish, aholi uchun munosib turmush sharoiti yaratish yuzasidan tegishli topshiriqlar bergan edi. O‘tgan davr mobaynida mazkur topshiriqlar ijrosi doirasida viloyatda keng ko‘lamli ishlar amalga oshirildi. Yangi sanoat korxonalari, tadbirkorlik sub’ektlari tashkil etildi. Mahsulot ishlab chiqarish va eksport hajmi oshdi. Zamonaviy uy-joylar, infratuzilma ob’ektlari bunyod etildi. Shu bois yurtboshimiz bu galgi   tashrifi davomida mazkur topshiriqlar ijrosi bilan tanishish barobarida  yangi tadbirkorlik sub’ektlari tashkil etish, aholi, ayniqsa, yoshlar bandligini ta’minlash bo‘yicha mutasaddilarga zarur ko‘rsatmalar berdi.

Davlatimiz rahbari dastlab Quva tumanida yangi barpo etilgan “Farg‘ona anorchilik” mas’uliyati cheklangan jamiyati shaklidagi agrofirma bilan tanishdi.  Aytish joiz, umumiy maydoni 300 gektardan oshiq mazkur agrofirmaning 289 gektariga 15 ga yaqin navli 272 ming tupdan ziyod anor ko‘chati ekilib, parvarishlanmoqda. E’tiborli jihati, ushbu agrofirmada 500ga yaqin kishining bandligi ta’minlangan. 2025 yilgacha anorzor maydonini 2 ming gektarga yetkazish rejalashtirilgan. Anorzor to‘liq hosilga kirgach, yiliga 10 ming tonna mahsulot yetishtiriladi. Tashrif chog‘ida yurtboshimiz anor yetishtirish, uni saqlash va qayta ishlash, tayyor mahsulotlarni eksport qilish bo‘yicha zarur ko‘rsatmalar, tavsiyalar berdi.

Shundan so‘ng, davlatimiz rahbari Oltiariq tumanidagi “Ismoil Nozim obod” fermer xo‘jaligi dalasida viloyat dehqon va fermerlari bilan uchrashdi. Qizg‘in muloqotlar chog‘ida yurtboshimiz g‘alla o‘rimi, g‘o‘zalar holatini ko‘zdan kechirish barobarida g‘alla hosilini yig‘ib olish, g‘o‘zadan kafolatlangan hosil yetishtirish va takroriy ekinlar ekish o‘ta muhim ekanini ta’kidladilar. Iqlim va ob-havo sharoitidan kelib chiqib, suvdan oqilona foydalanish, serhosil ekinlarni yetishtirish bo‘yicha aniq vazifalar belgilab berdilar.

To‘g‘risi, Prezidentimizning viloyatimizga tashrifi davomida hech bir masala e’tibordan chetda qolmadi. Qishloq xo‘jaligi, ta’lim, madaniyat, sport, qo‘yingki, barcha sohalarni yanada rivojlantirish, joylarda uchrayotgan muammolarni o‘z vaqtida bartaraf etish zarurligini ta’kidladilar.  

Ta’kidlash kerak, ikki kunlik tashrif chog‘ida berilgan topshiriqlar barcha soha vakillari qatori partiyamiz a’zolari zimmasiga ham katta mas’uliyat yuklaydi. Shu bois belgilab berilgan vazifalar ijrosini ta’minlash, tadbirkorlik va fermerlik faoliyatini yanada rivojlantirish, eng asosiysi, aholini hayotdan rozi qilish bo‘yicha istiqbolli vazifalarni belgilab oldik. Zotan, yurtboshimizning bu tavsiyalari boshlagan ishimizning ertasi porloq ekaniga ishonchimizni yanada mustahkamladi.

R.KAMOLOV,

 O‘zLiDeP Farg‘ona viloyat

Kengashi raisi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!