Kattaqo‘rg‘on tumani “Kichchikko‘rpa” mahallasida yashovchi Zubaydulla Mirzayev 12 sotixlik  yer maydonidan yiliga 4 marta hosil oladi. Shuni evaziga otaxon bir yilda 100 million so‘m daromad ko‘radi.

Zubaydulla otaning dehqonchilik tajriba maktabini ommalashtirish maqsadida O‘zLiDeP Samarqand viloyat Kengashi tomonidan Kattaqo‘rg‘on tumanida “Tomorqa – beminnat daromad manbai” mavzuida amaliy muloqot uyushtirildi.

Tadbirga Kattaqo‘rg‘on shahar, Ishtixon, Oqdaryo, Narpay tumanlaridan o‘z tomorqasida tadbirkorlik faoliyatini boshlamoqchi bo‘lgan hamyurtlarimiz taklif etildi.

–60 yildan buyon dehqonchilik bilan shug‘ullanaman. Bu kasb menga ota meros, – deydi otaxon. – 12 sotixlik tomorqamizda 5x5 oralig‘ida gilos ko‘chatlarini  ekkanman. Giloszor orasidagi maydonda yiliga 2 marotaba bodring va rediska yetishtiraman. To‘g‘risi, bo‘sh yotgan yerlarni ko‘rsam  jonim achishadi. So‘rasangiz, suvni muammo qilishadi. Bizni vohada 12 metrli trubani yerga qoqib, bitta nasos o‘rnatsa suv muammosi bartaraf etiladi.  Faqat unga qunt bo‘lsa bas.

Tadbir davomida viloyatning turli go‘shalaridan kelgan tomorqachilar tajribali dehqondan ekin ekishning barcha sir-asrorlarini o‘rgandi.

–Shaharda yashasamda 6 sotixlik tomorqamiz bor, – deydi Kattaqo‘rg‘on shahrida yashovchi Ergashjon Mamatov. – Endi bugundan boshlab Zubaydulla Mirzayevga shogird tushmoqchiman. Chunki otaxondan dehqonchilik sirlarini o‘rganib, tomorqamizda tadbirkorlik qilishni niyat qildim.

Baxtigul QARShIYEVA,

O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!