O‘zLiDeP Yangiobod tuman Kengashi tomonidan Prezidentimizning joriy yilning 7 iyundagi “Har bir oila – tadbirkor” Dasturini amalga oshirish to‘g‘risida”gi qarori mazmun-mohiyatiga bag‘ishlangan tadbir tashkil etildi.

Qayd etilganidek, mazkur qaror oilaviy tadbirkorlikni yo‘lga qo‘yish yoki faoliyatini kengaytirish harakatida yurgan ishbilarmonlarni nihoyatda xursand qildi. Zero, hujjatda bir qator zaruriy chora-tadbirlar qatori  qishloq va mahallalarda bo‘sh turgan yer maydonlarini yangi tashkil qilingan oilaviy tadbirkorlik sub’ektlariga berish orqali aholi uchun qo‘shimcha ish o‘rinlari va daromad manbalarini yaratish masalasiga alohida e’tibor qaratilgan.

– Tumanimizda qadimiy hunarmandchilik an’analari ko‘p, – deydi Xalq  deputatlari Yangiobod tuman Kengashidagi partiya deputatlik guruhi a’zosi  X.Nazarqulov. – Misol uchun, Ziyokor mahallasida ish qurollaridan tortib, dutor, rubob yasaydigan usta hunarmandlarimiz bor. Yoki tumanimizga xos to‘qimachilik turlarini olaylik. Bir paytlar bu yerlarda to‘qilgan gilamlar dovrug‘i uzoq-uzoqlarga tarqagan edi. Bu an’analarni tiklash, ularni zamonaviy texnologiyalarni jalb qilgan holda rivojlantirish, ishlab chiqarilgan mahsulotlar savdosini tashkil qilish orqali yangi ish o‘rinlari yaratish imkoniyati tug‘iladi. Davlatimiz rahbari tomonidan imzolangan mazkur Qaror esa bu boradagi ishlarni yanada tezlashtirdi desak, yanglishmaymiz.

Tadbirda hujjat ijrosini ta’minlash borasida partiya viloyat Kengashi tomonidan amalga oshirilishi lozim bo‘lgan muhim vazifalar belgilab olindi.

Dilshod TURSUNBOYEV,

O‘zLiDeP Jizzax viloyat

Kengashi xodimi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!