Dilshod Muhammadiyev Tayloq tumanidagi “Akmal Toshpo‘latovich” ko‘p tarmoqli  femer xo‘jaligi rahbari. 2006 yilda 17 gektar maydonda 5 nafar ishchi bilan faoliyatini boshlagan tadbirkor, hozir 40,5 gektar maydonda dehqonchilik qilmoqda. Dastlab g‘allachilik va pillachilikka ixtisoslashgan xo‘jalik ayni chog‘da  chorvachilik, baliqchilik, sabzavotchilik va issiqxona faoliyatini yo‘lga qo‘ygan.

– Prezidentimiz ko‘p tarmoqli fermer xo‘jaliklarini katta foyda berishi haqida bot-bot takrorlaydilar, – deydi D.Muhammadiyev. – Yurtboshimizning fikrlari to‘g‘ri ekanini o‘z tajribamda his etdim. Kelajakda rejalarimiz ko‘p. Hozirda 500-1000 tonna qishloq ho‘jalik mahsulotini saqlashga mo‘ljallangan (sovitish kamerasi) muzxona tashkil qilish harakatida yuribmiz. Agar loyihamiz amalga oshsa, qishloq xo‘jaligi mahsulotlarini saqlash va xorijga eksport qilish imkoniyati tug‘iladi.

Ta’kidlash kerak, mazkur ko‘p tarmoqli fermer xo‘jaligida 74 nafar ishchi-xodim mehnat qilyapti. Joriy yildan boshlab korxona faoliyati yanada kengaydi. U autsorsing tizimi orqali Samarqand viloyatidagi harbiy qismlardan biri va Samarqand shahridagi 60 maxsus maktab internatini oziq-ovqat mahsulotlari bilan ta’minlashni yo‘lga qo‘ydi.

Darvoqe tinib-tinchimas D.Muhammadiyev joriy yil 20 sotixlik yer maydoniga issiqxona tashkil etib, pomidor  yetishtirishni yo‘lga qo‘ydi. U issiqxonadan 80 million so‘m daromad olishni rejalashtiryapti.

Baxtigul QARShIYEVA,

O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!