2019 yil 1 yanvardan boshlab jismoniy shaxslarga umumiy qiymati 5 ming AQSh dollaridan ko‘p bo‘lmagan tovarlarni bojxona deklaratsiyasi taqdim etmasdan O‘zbekiston Respublikasidan olib chiqishga ruxsat etiladi. Bu haqida  O‘zLiDeP Siyosiy Kengashi Ijroiya qo‘mitasi va partiyaning Oliy Majlis Qonunchilik palatasidagi fraksiyasi hamkorligida Prezidentimizning “Tovar bozorlarida savdoni yanada erkinlashtirish va raqobatni rivojlantirish chora-tadbirlari to‘g‘risida”gi Farmoni targ‘ibotiga bag‘ishlangan davra suhbatida ta’kidlab o‘tildi.

Tadbirda Oliy Majlis qonunchilik palatasi deputatlari, Iqtisodiyot, Moliya vazirliklari, Soliq, Xususiylashtirilgan korxonalarga ko‘maklashish va raqobatni rivojlantirish davlat qo‘mitalari vakillari, partiya faollari hamda tadbirkorlar ishtirok etdi.

Tadbirda ta’kidlanganidek, Prezidentimizning mazkur farmoni tadbirkorlik sub’ektlari uchun katta imkoniyatlar yaratadi. Xususan, ulgurji savdoni amalga oshirish faoliyatini litsenziyalash va savdo korxonalarini soliqqa tortishning maxsus tartibi, aksiz solig‘i solinadigan tovarlarning ayrim turlarini (avtomobil, o‘simlik yog‘i va boshqalar) sotishdan tushadigan tushumlar hisobini yuritish va undan foydalanishning maxsus tartibi hamda ko‘chma savdo uchun ruxsatnoma olish talabi bekor qilindi.

O‘zLiDeP matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!