Hozirgi kunda O‘zLiDeP Farg‘ona viloyat Kengashi qoshidagi 44860 nafar a’zolar 802 ta boshlang‘ich partiya tashkiloti atrofida birlashgan. Ayni chog‘da mazkur quyi bo‘g‘inlarda hisobot-saylov yig‘ilishlari bo‘lib o‘tmoqda.

Oltiariq tumani Poloson qishlog‘ida joylashgan «Imona atlas» MChJ qoshidagi BPTning hisobot-saylov yig‘ilishi ham yuqori saviyada o‘tdi.

Yig‘ilishda BPT raisi Sabriniso Vahobova yurtimizda tadbirkorlar va ishbilarmonlarga yaratilayotgan shart-sharoitlar haqida to‘xtalib, o‘tgan yil mobaynida quyi bo‘g‘in tomonidan amalga oshirilgan ishlar xususida hisobot berdi.

–O‘tgan yili bankdan 400 mln. so‘m miqdorida kredit olib, korxonani qayta ta’mirladik. Qolaversa, Xitoy davlatidan 50 ta zamonaviy tikuv mashinalari olib kelib o‘rnatdik. Hozirda 20 dan ortiq mahsulotlarimiz ichki bozorda sifati va xaridorgirligi bilan ajralib turibdi, – deydi quyi bo‘g‘in yetakchisi S.Vahobova. 

Yig‘ilishda shuningdek, BPT faoliyatini kuchaytirish, deputatlar bilan quyi bo‘g‘in hamkorligida olib boriladigan ishlarda aniq  natijalarga erishish, partiya a’zolari safini kengaytirish masalalariga ham e’tibor qaratildi.

Yig‘ilish so‘ngida quyi bo‘g‘in faoliyatiga yuqori baho berilib, ishonchni oqlagan Sabriniso Vahobova qayta BPT raisligiga saylandi.

 Abror HAMDAMOV,

O‘zLiDeP Farg‘ona

viloyat Kengashi

BPT bilan ishlash

guruhi rahbari