O’zLiDeP partiyalararo, parlament va xalq diplomatiyasidan  foydalangan holda, eng avvalo O’zbekiston xalqining manfaatlarini himoya qilish, barcha yaqin va uzoq xorijiy  mamlakatlar, butun jahon hamjamiyati  bilan samarali hamkorlikni davom ettirishga qaratilgan tashqi siyosiy faoliyatni  qo‘llab-quvvatlaydi.

O’zLiDePning bu boradagi ishlarining yo‘nalishlaridan biri bu – Osiyo va Okeaniya siyosiy partiyalari forumi bo‘lgan Osiyo siyosiy partiyalari xalqaro konferensiyasi (ICAPP) doirasida partiyalararo hamkorlik  qilishdir.

Osiyo siyosiy partiyalari xalqaro konferensiyasining maqsadi Osiyo mamlakatlari o‘rtasida o‘zaro  anglashuv va  ishonchni yanada mustahkamlash maqsadida turli mamlakatlar siyosiy partiyalari o‘rtasida almashinuv va hamkorlikni yo‘lga qo‘yishdan iborat. Ushbu tuzilma doirasida siyosiy partiyalarning o‘ziga xos roli va kanali orqali Osiyo mintaqaviy  hamkorligi targ‘ib qilinmoqda  va shu bilan Osiyo va Okeaniyada  barqaror tinchlik, umumiy farovonlik  uchun muhit shakllantirilmoqda.

2021 yilning 24 fevralida “Covid-19 va undan keyingi davrda ayollarning huquq va imkoniyatlarini kengaytirish” mavzuida  bo‘lib o‘tgan  videokonferensiya ana shunday tadbirlardan biri bo‘lib, unda  O’zLiDeP Siyosiy Kengashi Ijroiya qo‘mitasi Ayollar Qanoti vakili ham  ishtirok etdi. Ayollar qanoti, ICAPP Kotibiyati xodimlari, xalqaro tashkilotlar sohasi ekspertlari, Osiyo mintaqasidagi siyosiy partiyalar  vakillari, jurnalistlar va taklif etilgan mehmonlar mavzuni on-layn rejimida atroflicha muhokama qilishdi.

Muzokaralarda O’zLiDeP Siyosiy Kengashi Ijroiya qo‘mitasi “Ayollar Qanoti” bo‘limi mudiri Sevara Muslimova O’zLiDeP ning g‘oyaviy  platformasi, “Ayollar qanoti” faoliyati, O’zbekistonda gender  tengligini ta’minlashda  siyosiy  partiyalarning roli va o‘rni hamda  mamlakatimizning   COVID-19 ga qarshi kurashish bo‘yicha muvaffaqiyatli tajribasi kabi masalalarga to‘xtaldi.

Prezidentimiz Shavkat Mirziyoyevning Birlashgan Millatlar Tashkiloti Inson huquqlari bo‘yicha kengashining 46-sessiyasida  so‘zlagan nutqidan kelib chiqadigan konseptual tezislarni  xorijiy  ekspertlar hamjamiyatiga  yetkazishga alohida e’tibor qaratildi.

Umuman olganda, ICAPP tadbiri tashkiliy jihatdan  yuksak darajada bo‘lib  o‘tdi, bu uning Osiyo mintaqasidagi  partiyalar o‘rtasidagi  bog‘lovchi bo‘g‘in sifatidagi maqomini  yanada oshirdi.