O‘zbekiston Respublikasida oila institutinimustahkamlash konsepsiyasini tasdiqlash to‘g‘risida

28.06.2018, 09:45

O‘zbekiston Respublikasida oila institutinimustahkamlash konsepsiyasini tasdiqlash to‘g‘risida
O‘zbekiston Respublikasi Prezidentining
 
q a r o r i


O‘zbekistonda oilani rivojlantirishga global darajada Birlashgan Millatlar Tashkilotining Barqaror taraqqiyot maqsadlari doirasida, shuningdek, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi doirasida qaraladi. 

Shu bilan birga, ushbu sohada davlat siyosatini muvaffaqiyatli olib borishni to‘xtatib turuvchi bir qator tizimli muammo va kamchiliklar oila institutini mustahkamlash sohasidagi islohotlarni to‘liq ro‘yobga chiqarishga va belgilangan maqsadlarga erishishga to‘sqinlik qilmoqda. Chunonchi: 

birinchidan, tegishli idora va tashkilotlar faoliyatini muvofiqlashtirish hamda monitoring qilishning ta’sirchan tizimi mavjud emas, oilani rivojlantirish masalalari bo‘yicha davlat, fuqarolik jamiyati institutlari va xususiy sektor hamkorligi past darajada; 

ikkinchidan, oila institutini mustahkamlash sohasidagi ilmiy tadqiqotlar ixtisosligi tor, hozirgi hayot voqeligidan uzilib qolgan, ilmiy tadqiqotlar natijalari amaliyotga sust joriy etilmoqda; 

uchinchidan, oilaning demografik rivojlanishida o‘zgarishlar yuz bermoqda, oila ajralishlari soni o‘smoqda, mazkur sohada salbiy tendensiyalar va muammolar sabablarini asoslovchi tadqiqotlar yetishmayapti; 

to‘rtinchidan, oilada, ta’lim muassasalarida madaniy-tarixiy meros salohiyatidan sust foydalanilmoqda, milliy mentalitetimizga yot bo‘lgan g‘oya va qarashlar ta’sirining oldini olish borasidagi ishlar samarasiz; 

beshinchidan, oila institutini mustahkamlashning qonunchilik asoslari mukammal emas, huquqni qo‘llash amaliyotini va ilg‘or xorij amaliyotini o‘rganish asosida oilani himoya qilish va qo‘llab-quvvatlash sohasida mustahkam huquqiy asos mavjud emas; 

oltinchidan, mutaxassislar yetishmaydi va kadrlar malakasi past darajada, ta’lim tizimida mutaxassislarga bo‘lgan ehtiyojni prognozlashtirish mexanizmi yo‘lga qo‘yilmagan, oila institutini mustahkamlash va rivojlantirish bo‘yicha o‘quv dasturlari mukammal emas. 

Oila institutini takomillashtirish bo‘yicha kompleks chora-tadbirlarni amalga oshirish, bu jarayonda davlat organlari, fuqarolik jamiyati institutlari va fuqarolarning yaqin hamkorligini hamda faol rolini ta’minlash maqsadida, shuningdek, O‘zbekiston Respublikasi Prezidentining 2018 yil 2 fevraldagi “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi PF–5325-son Farmoniga muvofiq: 

1. O‘zbekiston Respublikasining Konstitutsiyasiga binoan oila jamiyatning asosiy bo‘g‘ini hamda jamiyat va davlat muhofazasida bo‘lish huquqiga ega ekanligi ma’lumot uchun qabul qilinsin. 

2. Quyidagilar O‘zbekiston Respublikasida oila institutini mustahkamlash bo‘yicha asosiy yo‘nalishlar etib belgilansin: 

oila institutini mustahkamlashning institutsional va huquqiy asoslarini takomillashtirish, ijtimoiy sheriklikni kuchaytirish; 

zamonaviy oilani mustahkamlash va rivojlantirish masalalari bo‘yicha fundamental, amaliy va innovatsion tadqiqotlar olib borish; 

demografik rivojlanishni rag‘batlantirish va oila farovonligi darajasini oshirish; 

oilaning tarbiyaviy-ta’lim salohiyatini mustahkamlash, jamiyatda an’anaviy oilaviy qadriyatlarni saqlash, oilalarda ma’naviy-axloqiy muhitni yaxshilash; 

oilalarga ta’sirchan metodik, konsultativ va amaliy yordam ko‘rsatishning samarali tizimini yaratish. 

3. Quyidagilar: 

O‘zbekiston Respublikasida oila institutini mustahkamlash konsepsiyasi (keyingi o‘rinlarda Konsepsiya deb yuritiladi) 1-ilovaga muvofiq; 

O‘zbekiston Respublikasida oila institutini mustahkamlash konsepsiyasini amalga oshirish bo‘yicha “Yo‘l xaritasi” (keyingi o‘rinlarda “Yo‘l xaritasi” deb yuritiladi) 2-ilovaga muvofiq tasdiqlansin. 

Vazirliklar, idoralar, mahalliy davlat hokimiyati organlari va boshqa tashkilotlar rahbarlari “Yo‘l xaritasi”da nazarda tutilgan tadbirlar sifatli hamda to‘liq bajarilishi uchun shaxsan javobgar ekanligi belgilab qo‘yilsin. 

4. O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi (keyingi o‘rinlarda “Oila” markazi deb yuritiladi): 

Konsepsiya va “Yo‘l xaritasi”ni amalga oshirish jarayonining samarali muvofiqlashtirilishi hamda tizimli monitoringi, ularning ijrosi to‘g‘risida O‘zbekiston Respublikasi Vazirlar Mahkamasiga har chorakda axborot berilishini ta’minlasin; 

Konsepsiya va “Yo‘l xaritasi”ni amalga oshirishga bag‘ishlangan axborot-tahliliy sharhlarni aniq ko‘rsatkich va natijalarni ko‘rsatgan holda muntazam ravishda tayyorlash va ommaviy axborot vositalarida e’lon qilib borilishi choralarini ko‘rsin; 

zarur hollarda, fuqarolik jamiyati institutlari, ilmiy doiralar, xalqaro tashkilotlar vakillarini, xorijiy ekspertlarni Konsepsiya va “Yo‘l xaritasi”ni amalga oshirishda ishtirok etishga, shuningdek, oila institutini mustahkamlash bo‘yicha dolzarb masalalarni muhokama qilishga jalb qilsin. 

5. “Oila” markazi, O‘zbekiston Xotin-qizlar qo‘mitasi, “Mahalla” xayriya jamoat fondi, O‘zbekiston yoshlar ittifoqi va keng jamoatchilikning Birlashgan Millatlar Tashkiloti Bosh Assambleyasining 1993 yil 20 sentyabrdagi A/RES/47/237-son rezolyutsiyasi bilan e’lon qilingan Xalqaro oila kunini respublikaning barcha hududlarida har yili nishonlash to‘g‘risidagi taklifi ma’qullansin. 

“Oila” markazi respublikada 2019 yilda va keyingi yillarda Xalqaro oila kunini nishonlash to‘g‘risidagi Hukumat farmoyishi loyihasini 2018 yil 1 sentyabrga qadar O‘zbekiston Respublikasi Vazirlar Mahkamasiga kiritsin. 

6. O‘zbekiston Respublikasi Jismoniy tarbiya va sport vazirligi, Madaniyat vazirligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda muntazam ravishda sport va madaniy tadbirlarni tashkil qilsin hamda ularni Xalqaro oila kuni arafasida o‘tkazishga alohida e’tibor qaratsin. 

7. O‘zbekiston Milliy axborot agentligi, O‘zbekiston Milliy teleradiokompaniyasi, O‘zbekiston Matbuot va axborot agentligi ommaviy axborot vositalarida mazkur qarorning maqsad, vazifalari va Konsepsiyaning amalga oshirilishini yoritib borish bo‘yicha maqolalar e’lon qilinishini va mavzuga oid ko‘rsatuvlar efirga uzatilishini tashkil qilsin. 

8. “Oila” markazi O‘zbekiston Xotin-qizlar qo‘mitasi, Adliya vazirligi va boshqa manfaatdor idoralar bilan birgalikda ikki oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin. 

9. Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov, O‘zbekiston Respublikasi Bosh vazirining o‘rinbosari – O‘zbekiston Xotin-qizlar qo‘mitasi raisi T.K.Norboyeva, O‘zbekiston Respublikasi Prezidenti Davlat maslahatchisining birinchi o‘rinbosari B.M.Mavlonov va O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi direktori D.G.Toshmuhamedova zimmasiga yuklansin. 

O‘zbekiston Respublikasi Prezidenti                     SH.MIRZIYOYEV 

Toshkent shahri, 
2018-yil 27-iyun

O‘zLiDePning Facebook va Instagramdagi rasmiy sahifasi hamda Telegramdagi kanaliga a’zo bo‘lib, so‘nggi yangiliklardan xabardor bo‘ling!

  • Ko'rildi
    1200
  • Chop etish
  • Do'stlar bilan ulashish
← Orqaga qaytish

Bildirilgan fikrlar

Сабохат Бабаева Сирдарё вилоят Кенгаши "Аёллар бўлими"мудири2018-06-28 18:09:06

Президентимиз томонидан қабул қилинган "Ўзбекистон Республикасида оила институтини мустаҳкамлаш концепциясини тасдиқлаш тўғрисида"ги қарори республикамизда оила институтининг жамиятда жуда мухим ахамиятга эга эканлигини курсатади, Сирдарё вилоят Кенгаши " Аёллар каноти" вилоятимиздаги давлат ва нодавлат ташкилотлари билан янада ҳамкорликни мустаҳкамлаб оилаларимиз фаравонлиги учун партиямизнинг барча "Аёллар каноти" гурух фаоллари ва аёл депутатларимиз билан муносиб хисса кушамиз


Сабохат Бабаева Сирдарё вилоят Кенгаши "Аёллар бўлими"мудири2018-06-28 18:09:06

Президентимиз томонидан қабул қилинган "Ўзбекистон Республикасида оила институтини мустаҳкамлаш концепциясини тасдиқлаш тўғрисида"ги қарори республикамизда оила институтининг жамиятда жуда мухим ахамиятга эга эканлигини курсатади, Сирдарё вилоят Кенгаши " Аёллар каноти" вилоятимиздаги давлат ва нодавлат ташкилотлари билан янада ҳамкорликни мустаҳкамлаб оилаларимиз фаравонлиги учун партиямизнинг барча "Аёллар каноти" гурух фаоллари ва аёл депутатларимиз билан муносиб хисса кушамиз


Юлдашев Лутфулла Рахматуллаевич2018-06-28 16:38:49

Юлдашев Лутфулла. Чилонзор туман Кенгаши. Оила институтини баркарорлаштиришда оила бюджети катта ахамият касб этади. Халкаро экспертларнинг эътирофига кўра минимал ойлик маош қуйидагилардан иборат бўлиши керак: - инсоннинг ейиш-ичиш ва кийинишга кетадиган харажатлар; - фарзандларини ўқитиш учун кетадиган харажатлар; - коммунал эхтиёжлар, уй олишга кетадиган харажатлар; - инсон оиласи билан йилда бир маротаба дам олиши учун кетадиган харажатлардир. Шуларни хисобга олиб биз оилани тўкис таъминланишига эришишимиз керак.


Д.Абдуллажанова2018-06-28 16:26:30

Оилани мустаҳкамлашда психолог ва педагог кадрларни ўрни жуда катта. Консультатив психологияни ривожлантириш, таълим жараёнида қизларни ҳам ўғил болаларни ҳам оила тушунчасини тўғри англай билишларига ўргатиш билан келажакда мустаҳкам оилаларни барпо этишга асос бўлади. Мазкур ҳажжат "Аёллар қаноти" нинг барча тадбирларининг асоси бўлишига ва кўрсатилган омилларни бартараф этиш ва кўзланган мақсадга эришида ўз хиссасини қўшади.


Халилова Хуршида Абдувалиевна Андижон вилоят Кенгаши Аёллар масалалари бўйича раис ўринбосари 2018-06-28 16:15:43

Мҳтарам Президентимиз томонидан қабл қилинган "Ўзбекистон Республикасида оила институтини мустаҳкамлаш концепциясини тасдиқлаш тўғрисида"ги Қарори Республикамизда оила институтининг жамиятда муҳим аҳамиятга эга эканлигини кўрсатади. Нимага деганда оила қурган инсонлар биринчи ўринда соғлом бўлиши кераклиги, соғлом авлодни дунёга келиши муҳим аҳамиятга эга. Шундан келиб чиқиб соғлом оила, соғлом жамиятда соғлом таълим-тарбия олиб янада мустахкамланиб бориши аниқ бўлади ва бунда ҳам шифокорлар, педагоглар, хотин-қизлар қўмиталари ва маҳалла йиғини фаолларини роли катта бўлади.


Холмаматова Гулнора Сурхондарё вилояти Аёллар қаноти фаоли2018-06-28 15:25:54

Қарорда оилада, таълим муассасаларида маданий-тарихий меросларимизни янада ривожлантириш миллий анъана ва қадрятларимизни оилаларга ўрнак қилишимиз кераклиги таъкидланган. Хақиқатдан ҳам биз педагоглар, доимо уларни хам оилада ҳам таълим даргохларида ёшларимизга ўргатиб боришимиз зарур.


Матлуба Жўраева Сурхондарё вилоят Кенгаши "Аёллар қаноти" бўлим мудири 2018-06-28 15:18:41

Президентимиз томонидан қабул қилинган қарорда юртимизда оила муқаддаслиги, хотин-қизларимизнинг оилани тўлиқ қилиб туришда керак эканлигини яна бир бор ушбу қарор орқали белгилаб бердилар. Шундай экан партиямиз лойихалар орқали оилаларнинг мустахкамлиги, юртимизда бахтли оилаларнинг сонини кўпайиб ажримларни олидини олишги уз куч ва билим салоҳиятини жалб қилади.


туремуратова СТМ-Нукус2018-06-28 12:35:26

Хурматли Президентимиз томонидан қабул қилинган "Ўзбекистон Республикасида оила институтини мустаҳкамлаш концепциясини тасдиқлаш тўғрисида"ги қарори республикамизда оила институтининг жамиятда жуда мухим ахамиятга эга эканлигини курсатади, оила бу жамиятнинг асосий бўғини, шундай экан оилаларнинг мустахкамлигини таъминлаш, ажримларнинг олдини олишда Оила институтига катта масъулият юкланмоқда. Биз хам шу жамиятнинг хар бир аъзоси хар бир бахоналар билан бир-бирини тушинмай юрган ёш оилаларга ажрим олдини олишда тушинтириш ишларини олиб боришда фаол, бефарқ бўлмаслигимиз лозим


Мухримов А А Чилонзор туман Кенгаши2018-06-28 12:11:15

Мухримов А. А. Чилонзор туман Кенгаши - Миллий менталитетимизга ёд бўлган ғоя ва қарашлар таъсирини олдини олиш борасидаги ишлар самарасини ошириш учун мавкуравий ишларни тўғри йўлга қўйишимиз зарур.Бунинг учун биз инсонлар қалби ва онгини эгаллаш учун олиб борилаётган курашда замонавий мавкуравий усул ва воситалардан фойдаланишимиз керак.


O`zLiDeP Томди туман бўлими аппарат рахбари М.Абдазимов2018-06-28 11:31:57

Президентимизнинг оила институтини мустахкамлаш концепциясини тасдиқлаш тугрисида қорори қабул қилиниши ва халкаро оила кунини нишонланиши жамиятнинг асосии бугини булган оила деган этибори деб хисоблайман


Fikringizni qoldiring

+