Keyingi yillarda agrar sohaning boshqa yo‘nalishlari kabi yurtimizda uzumchilik ham yaxshi rivojlandi. Yangi tokzorlar barpo qilindi, daraxtlarga ishlov berish, sug‘orishda yangi texnologiyalar joriy qilindi. Mazkur tarmoqqa mas’ul yangi idoralar, muassasalar faoliyati yo‘lga qo‘yildi. 900 ming yurtdoshimiz uzumchilikda doimiy va mavsumiy ish bilan bandligi ham bu yo‘nalish ko‘lamidan darak bermoqda. Shunga yarasha salmoqli muvaffaqiyatlar qo‘lga kiritilyapti, hosildorlik tobora ortib boryapti.  Biroq yutuqlarga mahliyo bo‘lib qolish, xotirjamlikka berilish yaramaydi. Ayniqsa, uzumchilikda bor imkoniyatlardan to‘la foydalanilyapti, deb bo‘lmaydi.

Kecha Prezidentimiz raisligida uzum yetishtirish, uni sanoat usulida qayta ishlashni rivojlantirish hamda hududlarda enoturizmni yo‘lga qo‘yish chora-tadbirlari yuzasidan videoselektor yig‘ilishi o‘tkazildi.

 Qayd etilganidek, o‘tkazilgan tahlillar bu sohaga katta e’tibor qaratish, ko‘plab masalalarni hal etish zarurligini ko‘rsatmoqda. Chunonchi, ayrim hududlarda yirik tokzorlar maydoni so‘nggi to‘rt yilda 7 ming gektarga kamaygan. Tarmoqda seleksiya ishlari deyarli yo‘q, haligacha 40-50 yil avval yaratilgan uzum navlari ekilyapti. Ko‘chat yetishtirish ilmiga va texnologiyasiga amal qilinmaydi, ko‘chat kasalliklari bilan olimlar ham, ishlab chiqaruvchilar ham shug‘ullanmaydi. Shu bois hosildorlik ham pasayib, kasallik esa kun sayin ko‘payib bormoqda.

Yig‘ilishda uzumchilikni jadal rivojlantirishga to‘siq bo‘layotgan asosiy muammolar birma-bir tilga olindi va ularni hal qilishga qaratilgan vazifalar belgilandi.

Jumladan, tog‘oldi tumanlarida yirik uzumchilik plantatsiyalarini tashkil etiladi.  Qoraqalpog‘iston va viloyatlardagi 44 ta tumanda yangi eksportbop uzum plantatsiyalari barpo qilinadi. Ilmiy muassasalar tasarrufidagi yerlarda sertifikatlangan uzum ko‘chatlari yetishtirish yo‘lga qo‘yiladi. Uzumni qayta ishlash va tayyor mahsulotga aylantirishning to‘liq siklini yaratish uchun vinochilik klasterlari bunyod etiladi.

 Majlisda, shuningdek, mazkur tarmoqni rivojlantirish bilan bog‘liq ishlarni moliyaviy jihatdan qo‘llab-quvvatlash, rag‘batlantirish bo‘yicha tegishli tashkilotlarga topshiriqlar berildi.  

Muxtasar aytganda, uzumchilik tarmog‘iga jiddiy e’tibor qaratilib, tizimli isloh qilinayotgani yurtimiz aholisining ushbu mahsulotga bo‘lgan ehtiyojini qondirish bilan birga, qishloq xo‘jaligini barqaror rivojlantirishda o‘ziga xos omil bo‘ladi.