Ulug‘vor tarix, benazir madaniy merosga ega xalqmiz. Yurtimiz o‘tmishiga oid har bir osori-atiqa shundan dalolat berib turibdi.  Mamlakatimiz taraqqiyotining yangi bosqichida noyob tarixiy yodgorliklarimizga  e’tibor, hurmat, nafaqat o‘lkamiz, balki dunyoda ham tobora oshib borayotgani quvonarli.

Xususan, Prezidentimizning Fransiya  Respublikasi  Prezidenti  Emmanuel Makron taklifiga binoan ushbu mamlakatga rasmiy tashrifi davomida davlatlar rahbarlari tomonidan ikkita yirik ko‘rgazma ochildi.  Luvr muzeyida ochilgan “O’zbekiston vohalarining mo‘‘jizalari. Karvon yo‘llari chorrahasida”  va Arab dunyosi institutida tashkil etilgan “Samarqandga yo‘l. Ipak va oltin mo‘‘jizalari” ko‘rgazmalari olimlar, tadqiqotchilar, sayyohlarda  ulkan qiziqish uyg‘otmoqda. Ko‘rgazmalar kelgusi yilning 6 martigacha davom etadi.

Luvrdagi namoyish  butun tariximiz, eng Qadimgi Varaxsha, Afrosiyob devoriy suratlaridan tortib, hozirga qadar madaniyat va san’at sohasiga tegishli osori-atiqalarni mujassam etdi. Umumiy hisobda 320 dan ortiq eng yaxshi eksponatlar barchaga ko‘z-ko‘z qilinyapti. 

Madaniyat sohasidagi hamkorlik mamlakatni, xalqni dunyoga juda tez tanitadi. Turizm sohasida ham peshqadam Fransiyaga bir yilda 60 million sayyoh keladi. Luvr muzeyini esa   10 milliondan ko‘proq odam tomosha qiladi.  Ko‘rgazma davomida u yerda o‘zimizni ko‘rsatishimiz bizni yanada ko‘proq e’tirof etishlariga, O’zbekistonga, uning madaniyati va tarixiga nisbatan qiziqish ortishiga sabab bo‘ladi. Bu, o‘z navbatida, turizmni rivojlantirishga katta turtki beradi.

Saylovoldi dasturidan  O’zbekistonni jahon turizmining jozibali markaziga aylantirish, yurtimizni sayyohlar eng ko‘p tashrif buyuradigan dunyoning 30 ta davlati qatoriga izchillik bilan kiritish vazifasi ham o‘rin olgan partiyamiz, albatta, ana shunday tadbirlarni qo‘llab-quvvatlaydi.  

Madaniy boyliklarimizni ardoqlash, dunyoga tanitish farzandlarimizni yetuk, barkamol insonlar etib tarbiyalashda ham ahamiyati ulkan.