Xorazm viloyatida ham Oliy Majlis Qonunchilik palatasi va mahalliy Kengashlar deputatligiga O‘zLiDePdan ko‘rsatilgan nomzodlarning saylovchilar bilan uchrashuvlari qizg‘in davom etmoqda.

Yangiariq tumanidagi Qo‘riqtom Madaniyat saroyida Oliy Majlis Qonunchilik palatasi deputatligiga 61-Xorazm saylov okrugidan nomzod Ulug‘bek Yaqubovning saylovchilar bilan uchrashuvi bo‘lib o‘tdi.

Targ‘ibot tadbirida partiya saylovoldi dasturidagi ustuvor vazifalarga ham to‘xtalib o‘tildi. Jumladan, partiya qishloq xo‘jaligini iqlim o‘zgarishlariga mos holda rivojlantirish, tuproq va yaylovlar degradatsiyasining oldini olish yuzasidan Milliy dastur qabul qilinishi tarafdori ekanligini qayd etib o‘tdi.

Qishloq xo‘jaligiga mo‘ljallangan yer uchastkalarini haqiqiy bozor aktiviga aylantirish, ijara huquqini bo‘lib sotish, undan garov predmeti sifatida foydalanish uchun qonuniy bazani takomillashtirish kabi vazifalar partiyaning saylovoldi dasturidan o‘rin olgan.

- Partiya tomonidan fermer va dehqonlarga imtiyozli kreditlarni ajratish, ularning qaytarish muddatlarini mavsumiylikdan kelib chiqqan holda belgilashni taklif qilayotganliklari biz saylovchilarda juda katta qiziqish uyg‘otmoqda,- deydi tadbir ishtirokchisi Mardon Quryozov.- Bo‘lajak saylovlarda munosib nomzodlarga ovoz beramiz.

Targ‘ibot tadbirida saylovchilarni bo‘lajak saylovda O‘zLiDePni qo‘llab-quvvatlashga chaqirdilar.