Деновлик тадбиркор Мадина Муҳсинова раҳбарлигидаги оилавий корхона бугун нафақат ишлаб чиқаришни ривожлантирмоқда, балки аҳоли бандлигини таъминлашга ҳам муносиб ҳисса қўшмоқда. Автомобиллар учун ёпкичлар ишлаб чиқариш, тикувчилик ва қандолатчилик йўналишларида фаолият юритаётган корхонада 50 нафар ишчи, жумладан, 5 нафар имконияти чекланган инсон доимий иш билан таъминланган.
Мадина Муҳсинованинг меҳнатсеварлиги ва ташаббускорлиги “Ишбилармон аёл” кўрик-танловида ҳам муносиб эътироф этилди. У танловнинг туман босқичида ғолибликни қўлга киритди. Шунингдек, Фотима Исломова ҳамда Мавлуда Қаҳҳорова каби фаол тадбиркор аёллар ҳам совриндорлар сафидан ўрин олди.
Хотин-қизларнинг тадбиркорлик фаолиятини қўллаб-қувватлаш, янги иш ўринлари яратиш ва маҳаллий ишлаб чиқаришни ривожлантиришга қаратилган ислоҳотлар ўзининг амалий самарасини бермоқда. Деновлик тадбиркор аёлларнинг муваффақияти юртимизда ташаббускорлик, меҳнатсеварлик ва ишбилармонликни рағбатлантиришнинг яна бир ёрқин намунасидир.