Президентимиз Шавкат Мирзиёевнинг шиддат билан ўзгараётган мураккаб глобал вазиятда ўтаётган Бирлашган Миллатлар Ташкилоти Бош Ассамблеясининг 80-сессиясида сўзлаган нутқи бутун жаҳон ҳамжамияти эътиборини тортди, десак муболаға бўлмайди.

Давлатимиз раҳбарининг юксак минбардан туриб чин юракдан айтган сўзлари ҳар доимгидек жаҳон аҳлини ўйлантириб турган жиддий масалалар қамраб олинган конструктив таклиф ва ташаббуслари эътиборга лойиқ. Масалан, улардан айримлари санаб ўтамиз:

— Кенг минтақамиз миқёсида Осиё хотин-қизлар форумини доимий платформага айлантириб, мунтазам ўтказиб бориш;

— Бош Ассамблеянинг Марказий Осиё мамлакатларининг минтақавий шериклик ва иқтисодий интеграцияни чуқурлаштиришга қаратилган ҳаракатларини қўллаб-қувватлашга доир резолюциясини қабул қилиш;

—БМТнинг Терроризмга қарши кураш бошқармаси билан ҳамкорликда Реабилитация ва қайта интеграция масалалари бўйича тузилган Минтақавий Кенгашни Халқаро компетенциялар марказига айлантириш ва Терроризмга қарши кураш бошқармасининг минтақавий офисини Ўзбекистонда очиш;

—Афғонистон орқали халқаро транспорт ва энергетика коридорларини ривожлантириш бўйича БМТнинг алоҳида резолюциясини қабул қилиш;

—иқлим миграциясининг кучайиб бориши масаласида кенг халқаро шериклик ва мувофиқлаштирилган сиёсат юритиш бўйича Глобал пакт қабул қилиш; 

—соғлиқни сақлаш, таълим ва маданият соҳаларида сунъий интеллектнинг амалий ечимлари ва моделларини беғараз алмашишга қаратилган Халқаро ҳамкорлик механизми яратиш;

— “Жаҳон ёшларининг тинчлик сари ҳаракати”ни таъсис этиш ва унинг қароргоҳини Ўзбекистонда жойлаштириш каби таклиф ва ташаббуслар шулар жумласидандир.

Мамлакатимиз раҳбари ўз нутқида халқаро вазиятга баҳо берар экан, Ғазо секторидаги тобора кескин ёмонлашиб бораётган гуманитар инқирозни эътибордан четда қолдириб бўлмаслиги, бу ерда ҳарбий ҳаракатларни тўхтатиш ва сиёсий музокараларни давом эттиришга чақирди ҳамда Ўзбекистон БМТ резолюцияларига мувофиқ,  “икки халқ учун – икки давлат” тамойилини амалга оширишнинг қатъий тарафдори эканини билдирди. Шунингдек, Украина атрофидаги вазиятни ҳам дипломатик йўллар билан ҳал этиш бўйича юқори даражадаги мулоқотлар бошланганини олқишлади.

БМТнинг юксак минбаридан туриб билдирилган ушбу таклиф ва ташаббуслар яқин йилларда амалиётда ўз мевасини бера бошлайди. Уларнинг амалдаги инъикоси эса ҳозирги кунда дунёда кучаяётган қарама-қаршилик, низо ва урушларни, технологик ва ижтимоий тенгсизликни, иқтисодий ва гуманитар инқирозларни бартараф этишга хизмат қилади.

Зафар ХУДОЙБЕРДИЕВ,

Олий Мажлис Қонунчилик палатаси депутати