Корея билан ҳамкорлик: янги имкониятлар ва амалий натижалар

ЎзЛиДеП Сиёсий Кенгаши Ижроия қўмитаси раиси Актам Хаитов бошчилигидаги делегация Сеулда Ўзбекистоннинг Корея Республикасидаги Фавқулодда ва Мухтор элчиси Алишер Абдусаломов билан учрашди. Томонлар икки давлат раҳбарлари эришган келишувларни амалга оширишда партия ва элчихонанинг иштироки, шунингдек, партиялараро алоқаларни кенгайтириш масалаларини муҳокама қилдилар.

Мулоқотда кичик ва ўрта бизнес вакилларини қўшма лойиҳаларга жалб этиш, ҳудудлардаги ишлаб чиқарувчиларнинг Корея бозорига чиқишига кўмаклашишга алоҳида эътибор қаратилди. Шу муносабат билан "Korea Desk" ва Ўзбекистон – Корея бизнес кенгаши орқали икки мамлакат тадбиркорлари ўртасида бевосита алоқаларни йўлга қўйиш имкониятлари кўриб чиқилди.

Учрашувда қайд этилганидек, Ўзбекистонга жалб қилинган Корея инвестициялари ҳажми 8 миллиард доллардан ошган. Мамлакатимизда Корея капитали иштирокидаги 730 та корхона фаолият юритмоқда. Ўзбекистон Республикаси Президенти Шавкат Мирзиёевнинг 2026 йил сентябрда Корея Республикасига давлат ташрифи чоғида 13 та ҳужжат имзоланган, қарийб 12 миллиард долларлик истиқболли лойиҳалар шакллантирилган. Корея Эксимбанки билан 8 миллиард долларлик стратегик ҳамкорлик дастури қабул қилинган.

Мулоқотда биринчи "Марказий Осиё – Корея Республикаси" саммитида қабул қилинган Сеул декларациясининг аҳамияти ҳам қайд этилди. 2027 йилда икки давлат ўртасида дипломатик муносабатлар ўрнатилганига 35 йил тўлади. Шу муносабат билан 2027 йилни "Маданият ва ўзаро алмашинувлар йили" деб эълон қилиш бўйича келишувга эришилган.

Учрашув якунида ЎзЛиДеП ва элчихона ўртасидаги ҳамкорликни мустаҳкамлаш олий даражада эришилган келишувларни ҳудудларда амалга оширишга хизмат қилиши таъкидланди. Бунда маҳаллий тадбиркорларга Кореяда ҳамкор топиш, қўшма лойиҳаларда қатнашиш ва ўз маҳсулотларини ушбу мамлакат бозорига олиб чиқишда кўмаклашишга устувор аҳамият қаратилди.