Бугун маҳаллаларда хотин-қизлар тадбиркорлигини қўллаб-қувватлаш муҳим аҳамият касб этмоқда. Шу мақсадда OʻzLiDeP томонидан амалга оширилаётган “Маҳалланинг ишбилармон аёли” лойиҳаси доирасида Қува тумани “Янгичек” маҳалласида ўрганиш ва саралаш тадбири ўтказилди.

Тадбирда OʻzLiDeP Фарғона вилоят Кенгаши ва Қува туман Кенгаши масъул ходимлари иштирок этиб, маҳаллада фаолият юритаётган тадбиркор аёллар фаолияти билан яқиндан танишдилар.

Лойиҳа иштирокчиси Барнохон Икромова 25 сотих ер майдонида 100 дан ортиқ турдаги манзарали ва мевали кўчатлар етиштириб келмоқда. У 15 йиллик тажрибага эга бўлиб, доимий 20 нафар, мавсумий эса 50 нафаргача аёлларни иш билан таъминламоқда. Шунингдек, унинг маҳсулотлари нафақат маҳаллий, балки қўшни давлатларда ҳам харидоргир.

Тадбир давомида иштирокчилар тадбиркор аёлнинг иш тажрибасини ўрганиб, унинг фаолиятини юқори баҳоладилар ҳамда таклиф ва мулоҳазаларини билдирдилар.

Бундай ташаббуслар аёллар тадбиркорлигини ривожлантириш, янги иш ўринлари яратиш ва маҳалланинг иқтисодий барқарорлигини таъминлашда муҳим аҳамиятга эга.