Нурафшондаги “Тонг” маданият саройини таъмирлаш ишлари назоратдан ўтказилди
Олий Мажлис Қонунчилик палатаси депутати Виктор Пак Нурафшон шаҳрида бўлиб, сайловчилар билан учрашди ҳамда ҳудуддаги ижтимоий соҳа объектларининг ҳолати билан танишди.
Ташриф давомида маънавий тадбирлар ташкил этиладиган “Тонг” маданият саройида олиб борилаётган капитал таъмирлаш ишларига алоҳида эътибор қаратилди.
Маълумот учун, “Ташаббусли бюджет” лойиҳасининг 2026 йил биринчи мавсуми доирасида депутат ташаббуси билан мазкур объектни капитал таъмирлаш учун 1 миллиард 600 миллион сўм маблағ ажратилган эди. Депутат жойига чиққан ҳолда таъмирлаш жараёнини кўздан кечириб, бажарилаётган ишлар сифати ва белгиланган вазифалар ижроси билан танишди. Шунингдек, ажратилган маблағларнинг мақсадли ва самарали сарфланишига эътибор қаратилди.
Ташриф якунида таъмирлаш ишларини сифатли бажариш ва белгиланган муддатларда якунлаш ҳамда маданият саройида аҳоли учун қулай шароитлар яратиш юзасидан масъулларга тегишли тавсия ҳамда кўрсатмалар берилди.
