O'zLiDePнинг “Фаровон оила” ҳамда “Саломталик сари” лойиҳалари доирасида Оҳангарон туман тиббиёт бирлашмасида навбатдаги тадбир ташкил этилди.

O'zLiDeP Сиёсий Кенгаши Ижроия қўмитаси раиси ўринбосари Гулшана Худоёрова тренерлигида ўтган семинар-тренингда асосий эътибор аёлларнинг ҳуқуқ ва манфаатларини ҳимоя қилиш, хотин-қизларни ижтимоий ҳаётга фаол жалб этиш, айниқса, ажрим ёқасида турган аёлларни қўллаб-қувватлаш масаласига алоҳида эътибор қаратилди.

Хусусан, хотин-қизларнинг ҳуқуқий билимларни мустаҳкамлаш, ҳуқуқбузарликка мойиллиги бор аёллар билан якка тартибда иш олиб бориш, жазони ижро этиш муассасаларидан озод қилинган хотин-қизларнинг ижтимоий реабилитацияси ва жамиятга мослашиши учун шарт-шароит яратиш бўйича таклиф-тавсиялар тингланди.

Шунингдек, уларни оилавий тадбиркорлик ва ҳунармандчиликка йўналтириш бўйича партиявий лойиҳаларга кенг жалб этишга келишиб олинди.

Семинар-тренингда хотин-қизлар ўзларини қизиқтирган саволларга жавоб олишди.