Жорий йилнинг 27 март куни O'zLiDeP Сиёсий Кенгаши Ижроия қўмитаси раиси Актам Хаитовнинг Беларусь Республикасининг Ўзбекистондаги фавқулодда ва мухтор элчиси Александр Огородников билан учрашуви бўлиб ўтди.

Учрашувда икки давлат ўртасидаги стратегик ҳамкорлик, очиқ ва ишончли мулоқотларга асосланган муносабатлар изчил ривожланаётгани таъкидланди. Шунингдек, сиёсий партиялар ва парламентлараро алоқаларни мустаҳкамлаш халқ манфаатларини илгари суришда муҳим аҳамият касб этиши қайд этилди.

Элчи томонидан икки давлат ўртасидаги товар айирбошлаш ҳажми 1 миллиард долларга яқинлашаётгани ва 2030 йилгача бу кўрсаткични 2 миллиард долларга етказиш бўйича “йўл харитаси” ишлаб чиқилаётгани маълум қилинди.

Мулоқот давомида O'zLiDeP ва “Белая Русь” партияси ўртасида ҳамкорликни кенгайтириш, халқаро конференциялар ва форумларда ўзаро иштирок этиш масалалари муҳокама қилинди. 

Учрашув дўстона ва конструктив руҳда ўтиб, келгусидаги ҳамкорликни янада ривожлантиришга хизмат қилиши қайд этилди.