Самарқандда ўтказилаётган Парламентлараро иттифоқ Ёш парламент аъзоларининг XII глобал конференцияси Ўзбекистоннинг халқаро парламентлараро ҳамкорликдаги фаол ва ташаббускор позициясини яна бир бор намоён этмоқда. Нуфузли анжуманнинг мамлакатимизда ўтказилаётгани глобал сиёсий мулоқот учун Ўзбекистонга бўлган ишонч ва эътиборнинг юксалиб бораётганидан далолатдир.

Конференция дунёнинг турли мамлакатларидан келган ёш сиёсатчиларни бир майдонга жамлаб, замонавий муаммоларга ечим излаш, тажриба алмашиш ва ёшларнинг сиёсий жараёнлардаги ролини янада кучайтириш учун муҳим имконият яратмоқда. Айниқса, ёш авлод вакилларининг парламент фаолиятидаги иштироки келгуси сиёсат ва қонун ижодкорлигида янги ғоялар, замонавий ёндашувлар ҳамда конструктив мулоқотнинг аҳамиятини оширади.

Анжуманда Олий Мажлис Қонунчилик палатасидаги O‘zLiDeP фракцияси аъзолари, шунингдек, Қонунчилик палатаси ҳузуридаги Ёшлар парламенти аъзолари ҳам фаол иштирок этмоқда. Бу иштирок Ўзбекистон ёшларининг халқаро парламентлараро мулоқотда ўз позицияси ва ташаббусларини илгари суриши, хорижлик тенгдошлари билан тажриба алмашиши учун муҳим майдон бўлиб хизмат қилмоқда.