Нукусда O‘zLiDeP Қорақалпоғистон Республикаси Кенгаши ташаббуси билан хотин-қизларни тадбиркорликка жалб этиш, уларнинг ишбилармонлик салоҳиятини ошириш ҳамда иқтисодий фаоллигини қўллаб-қувватлаш мақсадида “Тадбиркорликни нолдан бошлаш” мавзуида семинар-тренинг ўтказилди. Унда партия масъуллари, фаол тадбиркор аёллар, касб-ҳунар ўрганаётган ёшлар ва тадбиркорликка қизиқиш билдирган хотин-қизлар иштирок этди.

Семинарда Амударё туманидаги нон ва сут маҳсулотларини қайта ишлаш билан шуғулланувчи “MF food” ва “AMUDARYO Milky Food” брендлари асосчиси, “Ишбилармон аёл-2025” танлови Қорақалпоғистон Республикаси босқичи ғолиби Дилдора Ҳайитбоева қатнашиб, ўзининг тадбиркорлик соҳасидаги тажрибаси, муваффақият сари босиб ўтган йўли ва аёллар учун амалий тавсиялари билан ўртоқлашди.

– Ҳар бир аёл иш бошлашда, албатта, қўллаб-қувватлашга муҳтож бўлади, - дейди Дилдора Ҳайитбоева. – Аввало, яқинларининг ишончи ва руҳий кўмаги, шундан сўнг эса давлат томонидан яратилаётган имкониятлар муҳим аҳамиятга эга. Мамлакатимизда эса хотин-қизлар тадбиркорлигини қўллаб-қувватлаш, ривожлантириш учун кенг шароит яратилган. Муҳими, аёллар ўз қобилиятига, қудратига ишониб иш бошлаб олса етарли. 

Семинар-тренинг фақат назарий маълумотлар билан чекланиб қолмади. Унда иштирокчилар учун марказ ошхонасида амалий машғулотлар ҳам ташкил этилди. Бу жараёнда хотин-қизлар нон маҳсулотларини тайёрлаш, масаллиқлар танлаш ва ишлаб чиқариш жараёни билан бевосита танишиш имконига эга бўлди. Шунингдек, энг фаол қатнашчиларга O‘zLiDeP Қорақалпоғистон Республикаси Кенгаши томонидан сертификатлар топширилди.