O‘zLiDeP ташаббуси билан “Халқ билан бирга” умуммиллий лойиҳаси доирасида Урганч шаҳрида “Ишбилармон аёл–2026” кўрик-танловининг шаҳар босқичи ўтказилди. Унда тадбиркорлик билан шуғулланаётган, янги ғоя ва ташаббуслари билан жамият ривожига ҳисса қўшаётган хотин-қизлар иштирок этди.
Танлов давомида иштирокчилар ўз бизнес лойиҳалари, ишлаб чиқараётган маҳсулотлари ва эришган натижаларини намойиш қилди. Бу каби ташаббуслар орқали хотин-қизларнинг тадбиркорлик салоҳиятини юзага чиқариш, уларнинг янги ғояларини қўллаб-қувватлаш ва янги иш ўринлари яратишга кўмаклашиш мақсад қилинган.
Танлов якунига кўра, “Ғайрат-Мустафо” оилавий корхонаси раҳбари Санобар Жуманиязова 1-ўринни қўлга киритди. Мазкур корхона 2010 йилдан буён новвот ишлаб чиқариш йўналишида фаолият юритиб, бугунги кунда 21 нафар хотин-қизни иш билан таъминлаб келмоқда. Келгусида сутни қайта ишлаш цехини ишга тушириш орқали яна қўшимча иш ўринлари яратиш режалаштирилган.
“Ишбилармон аёл” танлови нафақат энг фаол тадбиркорларни аниқлаш, балки янги бизнес ғояларни қўллаб-қувватлаш, тажриба алмашиш ва аёлларни тадбиркорликка кенг жалб этиш учун муҳим майдон бўлиб хизмат қилмоқда. Бу эса ўз навбатида бандликни таъминлаш, оилавий даромадларни ошириш ва ҳудудлар иқтисодий салоҳиятини юксалтиришга ҳисса қўшмоқда.