Хоразм вилояти Урганч туманида O‘zLiDeP ташаббуси билан “Ишбилармон аёл–2026” кўрик-танловининг туман босқичи ўтказилиб, унда маҳаллалардан 24 нафар фаол ва ташаббускор тадбиркор аёл иштирок этди. Иштирокчилар ўз бизнес лойиҳалари ва маҳсулотларини тақдим этиб, тадбиркорлик соҳасидаги тажрибаси ва янги ғояларини намойиш қилди. Якунларга кўра, “Хадича универсал оптом” оилавий корхонаси раҳбари Дилнура Атабаева 1-ўринни эгаллади.

2012 йилдан буён тадбиркорлик билан шуғулланиб келаётган Дилнура Атабаева раҳбарлик қилаётган корхонада трикотаж маҳсулотлари ишлаб чиқарилиб, 24 нафар хотин-қиз доимий иш билан таъминланган. Корхона маҳсулотлари Туркия ва Қозоғистонга экспорт қилинган. Тадбиркор яқинда 200 миллион сўм маблағ эвазига Хитойда ишлаб чиқарилган замонавий ускуналарни харид қилиб, махсус кийимларга сифатли логотиплар тушириш имкониятини йўлга қўйди.

Танловда 2-ўринни гул босилган газлама ва чокли матолар яратиш йўналишида фаолият юритаётган якка тартибдаги тадбиркор Фотима Эгамова, “Замонавий бунёдкор аёл” номинациясида эса “Алина тикувчилик” МЧЖ раҳбари Ўғилжон Шерова эгаллади.
Танловда иштирокчилар томонидан тақдим этилган бизнес лойиҳалари ва маҳсулотлар ҳакамлар ҳайъати томонидан муносиб баҳоланди.

Мазкур ташаббус хотин-қизларни тадбиркорликка кенг жалб этиш, уларнинг билим ва кўникмаларини ривожлантириш, маҳаллаларда бандликни таъминлаш ҳамда янги иш ўринлари яратишга қаратилгани билан аҳамиятлидир.