Касбга садоқат ва тадбиркорлик муваффақияти: 25 йиллик тажриба эгаси танловда ғолиб бўлди
Янгиариқ туманида O‘zLiDeP ташаббуси билан ўтказилган “Ишбилармон аёл – 2026” кўрик-танловининг туман босқичида маҳаллаларда фаолият юритаётган тадбиркор хотин-қизлар ўз бизнес лойиҳалари ва маҳсулотларини намойиш этди. Танлов якунларига кўра, “Савган” маҳалласи вакили Марямжон Худайназарова 1-ўринни қўлга киритди.
Таъкидлаш керак, М.Худайназарова 25 йиллик меҳнат тажрибасига эга тадбиркорлардан. У 2022 йилда “Марямжон” тикувчилик цехини ташкил этган. Бугунги кунда у 5 нафар хотин-қизни доимий иш билан таъминлаган, 3 минг нафардан ортиқ шогирд тайёрлаган ҳамда ижтимоий ҳимояга муҳтож хотин-қизлар ва ишсиз ёшлар учун бепул касб-ҳунар ўқув курсларини йўлга қўйган.
Танлов давомида иштирокчиларнинг бизнес ташаббуслари ва маҳсулотлари ҳакамлар ҳайъати томонидан баҳоланди, ғолиб ва иштирокчилар диплом ҳамда эсдалик совғалари билан тақдирланди. Мазкур кўрик-танлов хотин-қизларнинг тадбиркорлик салоҳиятини рўёбга чиқариш, маҳаллаларда бандликни ошириш ва янги бизнес ташаббусларини қўллаб-қувватлашга хизмат қилмоқда.
