Бухорода ёшларнинг креатив бизнес лойиҳалари тақдимоти бўлиб ўтди

Бухоро давлат университетида O‘zLiDePнинг “Халқ билан бирга” умуммиллий дастури доирасида “Креатив тадбиркор ёшлар” форуми бўлиб ўтди.

Форумнинг асосий қисмидa ёшлар ўзларининг креатив ва инновацион бизнес лойиҳаларини тақдим этди. Жумладан, Бобурмирзо Тойиров «Robokit», Миржон Ҳикматиллаев «Edumate», Зарина Комилова «Recarbon», Моҳинур Ҳикматиллаева «Kidgarden» ва Севинч Ҳасанова «TopAI» лойиҳалари билан иштирок этди.

Тақдимотлар давомида ёшларнинг мазкур ташаббусларини амалга ошириш имкониятлари ва иқтисодий аҳамиятига эътибор қаратилди. Иштирокчиларнинг ғоялари ёшларнинг билим ва салоҳиятини амалий лойиҳаларга йўналтириш, янги ечимлар устида ишлаш ҳамда тадбиркорлик кўникмаларини ривожлантиришга интилишини намоён этди.

Форум якунида фаол иштирокчилар ва истиқболли лойиҳалар муаллифлари партия фаоллари ҳамда депутатлар томонидан тақдирланди.