“Ишбилармон аёл – 2026”: тадбиркорлик салоҳияти, ташаббус ва муваффақият эътирофи
Хотин-қизларнинг ижтимоий-иқтисодий ислоҳотлардаги фаол иштирокини таъминлаш, уларнинг тадбиркорлик салоҳиятини рўёбга чиқариш ва ташаббусларини қўллаб-қувватлаш O‘zLiDePнинг устувор вазифаларидан биридир.
Ана шу мақсадда партиянинг “Халқ билан бирга” умуммиллий дастури доирасида O‘zLiDeP Самарқанд вилоят Кенгаши ташаббуси билан “Ишбилармон аёл – 2026” кўрик-танловининг ҳудудий-республика босқичи ташкил этилди.
Таъкидлаш керак, жорий йилда вилоятнинг 16 та туман ва шаҳридаги 1058 та маҳаллада ўтказилган саралашларда 16 нафар энг фаол тадбиркор аёл ҳудудий-республика босқичида қатнашиш ҳуқуқига эга бўлган эди. 4 ноябрь куни Самарқанд шаҳридаги “Ипак йўли” туризм ва маданий мерос халқаро университетида ўтказилган тадбирда партия вакиллари, депутатлар, тадбиркор аёллар ҳамда меҳмонлар иштирок этди.
Танловда қатнашган хотин-қизлар ўз тадбиркорлик фаолияти, ишлаб чиқараётган маҳсулотлари, амалга ошираётган лойиҳалари ва истиқболдаги режаларини намойиш этдилар. Якуний натижаларга кўра, Самарқанд шаҳридан “Hamida Inoyatova art fashion” директори, зардўзлик санъати устаси ва этно-авангард йўналиши асосчиси Ҳамида Жўрақулова биринчи ўринни эгаллади.
Қайд этиш керак, “Ишбилармон аёл – 2026” кўрик-танлови хотин-қизларнинг тадбиркорлик салоҳиятини намоён этиш, муваффақиятли бизнес тажрибаларини оммалаштириш ва янги ташаббусларни рағбатлантириш учун муҳим майдон бўлмоқда. Зеро, бугунги тадбиркор аёл нафақат оиласи фаровонлигини таъминламоқда, балки янги иш ўринлари яратиб, бошқа хотин-қизларни ҳам меҳнат ва тадбиркорликка жалб этмоқда. Танлов орқали улар ўртасида тажриба алмашиш, ҳамкорлик алоқаларини мустаҳкамлаш ва аёллар тадбиркорлигини янада ривожлантириш учун янги имкониятлар яратилмоқда.
