Давлатимиз раҳбарининг Туркия Республикаси Президентининг таклифига биноан ушбу мамлакатга расмий ташрифи нафақат стратегик шерикликни мустаҳкамлашга, балки минтақавий барқарорлик, ижтимоий адолат, инсонпарварлик ва тараққиёт ғояларини бирдамликда илгари суришга ҳам хизмат қилади.

Ўзбекистон ва Туркия яқин йилларда икки томонлама товар айирбошлаш ҳажмини сезиларли даражада ошириш мақсадини қўяётгани уларнинг ўзаро манфаатдорлик ва ҳамкорликнинг реал натижаларига интилаётганидан далолат беради.

Ўзаро савдода энг қулай режим ва Имтиёзли савдо тўғрисидаги битим амал қилмоқда. Бу эса бизнес учун қулай шароитлар яратмоқда. Туркия барқарор равишда Ўзбекистоннинг етакчи савдо-иқтисодий шериклари қаторига кириб, товар айирбошлаш ва импорт ҳажми бўйича тўртинчи, экспорт ҳажми бўйича эса бешинчи ўринни эгаллаб келмоқда.

Инвестициявий ҳамкорлик ҳам икки томонлама муносабатларнинг асосий элементи ҳисобланади. Жорий йил 1 январь ҳолатига кўра, Ўзбекистонда Туркия капитали иштирокидаги 2,2 мингта корхона фаолият юритмоқда, бу хорижий инвестициялар иштирокидаги корхоналар умумий сонининг қарийб 12 фоизини ташкил этади.

Туркиянинг етакчи компаниялари иштирокида қиймати 9 миллиард долларлик лойиҳалар портфели шакллантирилган. Туркия капитали асосан Ўзбекистон иқтисодиётининг устувор тармоқларига, жумладан, энергетика, қайта ишлаш саноати, қишлоқ хўжалиги ва қурилиш соҳаларига йўналтирилган.

Бу ва бошқа тенденциялар Анқара шаҳрида бўлиб ўтган тадбир давомида яққол намоён бўлди. Ушбу тадбир якунларининг таҳлили фаол сиёсий мулоқот, мунтазам давлатлараро маслаҳатлашувлар, шартномавий-ҳуқуқий базани кенгайтириш ва маданий-гуманитар алмашинувни ривожлантириш тарафдори бўлган давлат раҳбарларининг муҳим ролини кўрсатади.

Ушбу саъй-ҳаракатларнинг барчаси икки томонлама муносабатларни ўзаро ишончни мустаҳкамлаш, иқтисодий алоқаларни кенгайтириш ҳамда минтақавий ва глобал вазифаларни биргаликда ҳал этишга йўналтирилган шерикликнинг янги босқичига олиб чиқишга хизмат қилди.

Юқори даражадаги Стратегик ҳамкорлик кенгашининг тўртинчи йиғилиши давомида Кенгаш йиғилишларини мунтазам ўтказиш, Ҳукуматлараро комиссия ва Стратегик режалаштириш гуруҳи механизмларидан самарали фойдаланиш бўйича қарорлар қабул қилинди.

Фикримизча, эришилган келишувларни ўз вақтида ва сифатли амалга ошириш бўйича комплекс “йўл харитаси”нинг ишлаб чиқилиши ва қабул қилиниши ҳамкорликнинг амалий аҳамиятини тасдиқлайди.

Шу ўринда замонавий босқичда Ўзбекистон — Туркия муносабатлари барқарор, тизимли ва кўп жиҳатдан прагматик хусусият касб этганини алоҳида таъкидлаш жоиз. Товар айирбошлаш ҳажмининг ўсиши, кенг кўламли инвестициявий таркибий қисм ва саноат кооперациясининг кенгайиши билан мустаҳкамланган иқтисодий ҳамкорлик давлатлараро муносабатларнинг бутун мажмуаси учун асосий драйверга айланмоқда.

Иқтисодий, сиёсий ва гуманитар жиҳатларнинг уйғунлиги икки томонлама алоқалар барқарорлигининг муҳим омили бўлиб қолмоқда. Мазкур контекстда томонларнинг аниқ мақсадларга эришишга интилиши Ўзбекистон —Туркия муносабатларини икки мамлакат ва халқларнинг узоқ муддатли манфаатларига жавоб берадиган мувозанатли ва изчил давлатлараро ҳамкорлик намунаси сифатида баҳолашга имкон беради.

Актам ХАИТОВ,

Олий Мажлис Қонунчилик палатасидаги

O'zLiDeP фракцияси раҳбари