Bugungi kunda O‘zbekistonda chuqur o‘ylangan va konstruktiv tashqi siyosatni amalga oshirish, xorijiy davlatlar bilan do‘stona va o‘zaro manfaatli munosabatlarni rivojlantirish bo‘yicha salmoqli natijalarga erishilmoqda. Dunyodagi taraqqiy etgan mamlakatlar bilan o‘zaro manfaatli hamkorlikni yanada rivojlantirishga alohida e’tibor berildi, ShHT va boshqa nufuzli xalqaro tashkilotlar bilan hamkorlik aloqalari sifat jihatdan yangi bosqichga chiqdi.

Bunda davrning o‘zi O‘zLiDePdan yetakchi siyosiy partiya sifatida o‘z faoliyatining tashqi siyosat yo‘nalishi bo‘yicha samaradorligini oshirishni talab etmoqda. Bu mahalliy korxonalar mahsulotlarini eksportga yo‘naltirish, sanoat va infratuzilmani modernizatsiyalash uchun chet el investitsiyalari, ilg‘or texnologiyalar va bilimlarni jalb qilish, O‘zbekistonga sayyohlar oqimini oshirish kabi ustuvor masalalarga ham daxldordir. Partiyaning fikricha, xorijiy hamkorlar uchun O‘zbekistonda amalga oshirilayotgan tub o‘zgarishlar va islohotlar, ichki va tashqi siyosat ustuvorliklari, biznes va investitsiyalar uchun yangi qulay sharoitlar haqida manzilli axborot-targ‘ibot ishlarni tashkil etishga alohida e’tibor qaratish zarur.

Mazkur vazifalar Xitoy Xalq Respublikasining Shenchjen shahrida 2018 yilning 26 mayida bo‘lib o‘tgan ShHT siyosiy partiyalari birinchi Forumi doirasida O‘zLiDeP delegatlari tomonidan muhokama etildi. O‘zLiDeP Siyosiy Kengashi Ijroiya qo‘mitasi raisi vazifasini bajaruvchi Baxtiyor Yakubov Forum ishtirokchilarini mamlakatimizning bugungi zamonaviy qiyofasi, 2017-2021 yilda O‘zbekiston Respublikasini rivojlantirishning beshta ustuvor yo‘nalishlari bo‘yicha Harakatlar strategiyasining amalga oshirilishi, bozor islohotlarini hayotga tadbiq etish, kichik biznes va xususiy tadbirkorlik, fermerlik harakatini rivojlantirish uchun keng imkoniyatlar va qulay sharoitlarni yaratish hamda O‘zLiDePning mazkur jarayonlardagi roli va o‘rni bilan tanishtirdi. Tadbirda qariyb dunyoning 20 davlatidan 30 dan ziyod siyosiy partiyalarning 200 nafarga yaqin xitoylik va chet el vakillari, shu jumladan, ShHT hamda kuzatuvchi mamlakatlar va muloqot bo‘yicha hamkorlar a’zolari ishtirok etgani xorijiy hamkasblar bilan ishlashning bu kabi shakli samaradorligidan dalolat beradi.

B. Yakubov, shuningdek, partiyaning ShHTga doir pozitsiyasini bildirib, uni Markaziy Osiyoda barqarorlik va xavfsizlikni mustahkamlash, iqtisodiy o‘zaro hamkorlikni rivojlantirish borasida ko‘p tomonlama hamkorlik mexanizmi, ochiq va konstruktiv muloqot uchun maydoncha hamda turli yo‘nalishlarda sheriklikni rivojlantirish vositasi ekanligini ta’kidladi. O‘zLiDePning fikricha, ShHT mamlakatlari siyosiy partiyalari o‘rtasida partiyalararo hamkorlikni kengaytirish tashkilotning asosiy maqsadlari va vazifalarini amalga oshirish borasida ko‘p tomonlama o‘zaro hamkorlikni kuchaytirish yo‘lida yana bir amaliy qadam bo‘ldi.

O‘zLiDeP tashkilot doirasida mintaqaviy barqarorlikni qo‘llab-quvvatlash, iqtisodiy va investitsion hamkorlikni rivojlantirish kabi yo‘nalishlarda sa’y-harakatlarni birlashtirishni muhim deb hisoblaydi. Siyosiy partiyalar ShHT istiqbollarini mustahkamlash uning salohiyatini kengaytirishga qodir, bu tashkilotning jahon hamjamiyatidagi roli va nufuzi o‘sishiga ijobiy ta’sir ko‘rsatadi.

Forum doirasida O‘zLiDeP delegatsiyasi dunyo va mintaqaviy iqtisodiy rivojlanishga doir keng ko‘lamli masalalar hamda ShHT doirasidagi savdo-iqtisodiy va gumanitar hamkorlik, partiyalararo aloqalarni o‘rnatish borasida fikr almashdi.

Umuman olganda, O‘zLiDePning fikricha, mazkur Forum partiyalararo muloqot “Shanxay ruhi”dagi hamkorlik, davomiylik prinsiplariga rioya qilish, tashkilot doirasida ShHTga a’zo davlatlar manfaatlariga javob beradigan aloqalarni izchil mustahkamlash va o‘zaro manfaatli rivojlanish mexanizmlaridan biriga aylanmoqda.

O‘zLiDeP Matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!