Oliy Majlis Qonunchilik palatasi deputati Nargiza Salomova Yakkabog‘ tumanida bo‘lib, “Daryo” mahalla fuqarolar yig‘ini hududida saylovchilar bilan ochiq va samimiy uchrashuvlar o‘tkazdi. O‘rganishlar davomida aholi bilan yuzma-yuz muloqot qilinib, ularni qiynayotgan masalalar, muammo va takliflar joyida o‘rganildi.

Uchrashuvlarda Prezidentimizning Oliy Majlis va xalqimizga yo‘llagan Murojaatnomasi hamda “O‘zbekiston – 2030” strategiyasida belgilangan ustuvor vazifalar mazmun-mohiyati tushuntirildi. Xususan, kambag‘allikni qisqartirish, aholi bandligini ta’minlash, “og‘ir” mahallalarda yangi ish o‘rinlari yaratishga qaratilgan chora-tadbirlar haqida ma’lumotlar berildi.

Shuningdek, deputat xonadonlarga tashrif buyurib, aholining ijtimoiy-iqtisodiy ahvoli va kundalik hayoti bilan yaqindan tanishdi. Aniqlangan muammolar nazoratga olinib, ularni hal etish bo‘yicha tegishli choralar ko‘rilishi ta’kidlandi.