Joriy yilning 11-sentabr kuni O‘zLiDeP Siyosiy Kengashi Ijroiya qo‘mitasida YXHT Demokratik institutlar va inson huquqlari bo‘yicha byurosining Saylov departamenti boshlig‘i o‘rinbosari Ulvi Axundlu hamda departamentning saylov bo‘yicha maslahatchisi Kaxa Inaishvililar bilan uchrashuv bo‘lib o‘tdi.

Uchrashuvda O‘zLiDeP vakillari mehmonlarga partiya tomonidan saylovlardan keyin o‘tgan vaqt davomida partiya o‘zining Oliy Majlis Qonunchilik palatasidagi fraksiyasi va xalq deputatlari mahalliy kengashlaridagi partiyaviy guruhlari orqali saylovoldi dasturini amalga oshirish borasida amalga oshirayotgan ishlar, O‘zbekiston saylov tizimida ilk bor aralash tizim asosida amalga oshirilgan saylovlarning deputatlik korpusi faoliyatidagi sifat o‘zgarishlariga ta’siri, partiya oldida turgan galdagi vazifalar bilan tanishtirib o‘tishdi.

O‘z navbatida Ulvi Axundlu samimiy qabul uchun minnatdorchilik bildirib, YXHTning Demokratik institutlar va inson huquqlari byurosi bilan O‘zbekistonning saylovlarga daxldor sub’yektlari o‘rtasida o‘zaro ishonchli munosabatlar shakllanganligiga to‘xtalib o‘tdi.

Ushbu tashrifning asosiy maqsadi 2024-yil oktyabrida bo‘lib o‘tgan O‘zbekistondagi parlament saylovlari yakunlariga bag‘ishlangan yakuniy hisobotning asosiy jihatlarini yana bir bor ochib berish, O‘zbekistondagi saylov sub’yektlari bilan keyingi hamkorlik yo‘nalishlarini belgilab olishdan iborat ekanligiga urg‘u berdi.

Uchrashuvda har ikki tomonni qiziqtirgan bir qator masalalar borasida fikr almashuvlari amalga oshirildi.

Muloqot  konstruktiv va ishonchli ruhda bo‘lib o‘tdi.