O‘zbekiston Respublikasi Davlat mustaqilligining 34 yilligi munosabati bilan “Vatan uchun, millat uchun, xalq uchun!” shiori ostida Samarqand viloyatida “Ishbilarmon ayol–2025” ko‘rik-tanlovi o‘tkazildi.

Tanlovda viloyatning barcha tuman va shaharlaridan 742 nafar ishbilarmon xotin-qizlar qatnashib, kichik biznes, oilaviy tadbirkorlik, xizmat ko‘rsatish, hunarmandchilik va fermerlik yo‘nalishlaridagi yutuqlari bilan bellashdilar. Saralash bosqichlari yakunlariga ko‘ra, 42 nafar ishtirokchi g‘olib sifatida taqdirlandi, 14 nafar eng istiqbolli ayollar esa viloyat bosqichida bellashish imkoniyatiga ega bo‘ldilar.

Hududiy-respublika bosqichida birinchi o‘ringa qo‘shrabotlik tadbirkor ayol Zebiniso Abdurazoqova, ikkinchi o‘ringa urgutlik hunarmand Muqaddam Jabborova, uchinchi o‘ringa esa toyloqlik fermer ayol Mavluda Haydarova munosib deb topildi. Shuningdek, 5 nafar ishtirokchi turli nominatsiyalarda e’tirof etildi, 40 dan ziyod xotin-qizlar esa estalik sovg‘alar bilan taqdirlandilar.

— 15 yildan beri qandolatchilik bilan shug‘ullanib kelaman, — deydi tanlov g‘olibi Zebiniso Abdurazoqova. — Avval o‘z xonadonimda ish boshlagan bo‘lsam, hozirda “KEYK LEDI ZEBO” nomi bilan qandolatchilik syexim faoliyat ko‘rsatmoqda. Syeximizda 10 nafar ishchi doimiy band, 100 dan ortiq shogirdlarga pishiriqlarni tayyorlash sir-asrorlarini o‘rgatdim. Mahsulotlarimizning ichki bozorda xaridorgirligi va bu kabi tanlovlarda e’tirof etilishi meni yanada yangi maqsadlar sari ruhlantiradi.