2017-yilning 23-avgust kuni O‘zLiDeP Siyosiy Kengashi Ijroiya qo‘mitasi va partiyaning Oliy Majlis Qonunchilik palatasidagi fraksiyasi tashabbusi bilan videokonferensaloqa shaklidagi yig‘ilish bo‘lib o‘tdi. Unda hukumat portalida umumxalq e’tiboriga havola etilgan O‘zbekiston Respublikasi Prezidentining “Tadbirkorlik faoliyatini rivojlantirishni qo‘llab-quvvatlash tizimini tubdan takomillashtirish va biznes yuritish shart-sharoitlarini yaxshilash chora-tadbirlari to‘g‘risida”gi Farmoni hamda “Tadbirkorlik faoliyati sohasidagi litsenziyalar va ruxsat berish tartib-taomillarini yanada qisqartirish va soddalashtirish chora-tadbirlari to‘g‘risida”gi Qarori loyihalari xususida so‘z yuritildi.

Mamlakatimizda tadbirkorlik faoliyatining xuquqiy asoslarini yanada mustahkamlash borasida amalga oshirilayotgan tizimli ishlarning yangi bosqichini boshlab berayotgan ushbu loyihalar tadbirkorlik sub’ektlari uchun nihoyatda muhim ahamiyatga egadir. Zero, uning qabul qilinishi bilan mamlakatda tadbirkorlik faoliyatini yuritish sifat jihatidan yangi bosqichga ko‘tarilishi, tabiiy. Negaki, qizg‘in davom etayotgan loyihalar muhokamasi jarayonida tadbirkorlar fikrlarini o‘rgangan holda aniq takliflarni kiritish maqsad qilingan.

Mamlakatning barcha viloyatlarini qamragan videokonferensiya shaklidagi muhokamalarda 700 dan ortiq tadbirkorlik sub’ektlari vakillari qatnashdilar va har ikkala loyiha yuzasidan o‘z fikrlarini bildirish imkoniyatiga ega bo‘ldilar.

Shuningdek, muhokamalarda O‘zLiDeP Siyosiy Kengashi Ijroiya qo‘mitasi, partiyaning parlamentdagi fraksiya a’zolari, qator tegishli vazirlik va idoralar mas’ul xodimlari, ekspertlar, videokonferensaloqa orqali esa partiyaning barcha hududiy Kengashlari va joylardagi partiya faollari bevosita ishtirok etdi. 

Mamlakat rahbarining farmon va qarorlari loyihalarini umumxalq muhokamasiga qo‘yish bu davlat organlari faoliyatida ochiqlikni ta’minlash, qarorlar qabul qilish jarayoniga manfaatdor aholi qatlamlarini jalb qilishda misli ko‘rilmagan tajriba deb baholandi. Davlatimiz rahbari o‘zlarining bu harakatlari bilan davlat boshqaruvining boshqa organlariga o‘rnak bo‘layotganligi ta’kidlandi. Xususan, tadbirkorlar o‘z faoliyati uchun daxldor bo‘lgan hujjatlarni qabul qilishda bevosita qatnashish, demakki ushbu xujjatlarning qabul qilinishida ishtirok etish, ular yuzasidan o‘z takliflarini bildirish imkoniyati paydo bo‘lganligidan mamnun ekanligini bildirishdi.

Yig‘ilishda so‘zga chiqqan mutaxassislar ishtirokchilarni loyihalarning mazmun-mohiyati bilan atroflicha tanishtirdi.

Ta’kidlanganidek, 2017-2021 yillarda O‘zbekiston Respublikasini rivojlantirishning besh ustuvor yo‘nalishi bo‘yicha Harakatlar strategiyasiga muvofiq mamlakatimizda davlatning iqtisodiyotdagi ishtirokini qisqartirish, xususiy mulk huquqlari himoyasini va ustuvor rolini yanada kuchaytirish, kichik biznes va xususiy tadbirkorlikni rivojlantirishni rag‘batlantirishga qaratilgan keng miqyosli institutsional va tarkibiy islohotlar amalga oshirilmoqda.

Shu bilan birga qator sohalarda muammolarning saqlanib qolayotgani, ular davlatning qulay investitsiya va ishbilarmonlik muhitini yaratish, tadbirkorlikni jadal rivojlantirishga doir siyosatini samarali amalga oshirishga to‘sqinlik qilayotgani kuzatilmoqda. Tadbir ishtirokchilari tomonidan davlatimiz rahbarining farmoni va qarori loyihalarida bu borada mavjud muammolarni hal qilishga qaratilgan kompleks chora-tadbirlar ko‘zda tutilgani qayd etildi.

Tadbir davomida tadbirkorlar, ekspertlar tomonidan loyihalarni takomillashtirish borasida amaliyotdan kelib chiqqan holda bir qator takliflar ham bilidirildi. Xususan, mamlakatimizda yuritilayotgan tadbirkorlik faoliyati uchun nihoyatda progressiv ahamiyatga ega bo‘lgan bir qator tamoyillar, masalan, “gilotina” tamoyili kiritilganligi nihoyatda yuqori baholanib, shu bilan birga uni qo‘llash mexanizmi to‘liq ochib berilishi maqsadga muvofiqligi aytib o‘tildi. Shuningdek, ushbu tamoyilni amalda qo‘llanilishi ustidan nazoratni amalga oshiruvchi vakolatli organni belgilab qo‘yish zarurligi ham aniq belgilanishi maqsadga muvofiqligi aytib o‘tildi. Muhokama ishtirokchilari tomonidan yuqori turuvchi huquqiy hujjatlarga mos kelmaydigan, biznes yuritish sharoitlarini yomonlashtirishi mumkin bo‘lgan normativ-huquqiy hujjatlarning qabul qilinganidan olti oydan so‘ng ixtiyoriy tarzda o‘z kuchini yo‘qotishi tadbirkorlar orasida juda ko‘tarinkilik bilan qabul qilingan ilg‘or g‘oya ekanligi, lekin uni to‘laqonli qo‘llash bir qator boshqa qonunlarga o‘zgarishlar kiritishni talab qilishi ta’kidlandi. 

Loyihalarda ilgari surilgan g‘oyalarning nihoyatda ilg‘or, milliy qonunchiligimizda ilgari kuzatilmagan zamonaviy yondashuvlarga boyligi uning har bir qismi yuzasidan qizg‘in bahs-munozaralarga sabab bo‘ldi. 

Majlis yakunida loyihalar muhokamasini bevosita xududlarda ham amalga oshirish, ularning yakunlari bo‘yicha tushgan takliflarni umumlashtirib, tegishli ishchi guruhiga yetkazishga kelishib olindi.

O‘zLiDeP matbuot xizmati

O‘zLiDePning Facebook’dagi rasmiy sahifasi va Telegram’dagi kanaliga a’zo bo‘lib, so‘nggi yangiliklardan xabardor bo‘ling!