2017-yilning 8-avgust kuni Tadbirkorlar va ishbilarmonlar harakati – O‘zbekiston Liberal-demokratik partiyasi Siyosiy Kengashining navbatdagi majlisi bo‘lib o‘tdi. Majlisda O‘zbekiston Respublikasi Prezidenti Shavkat Mirziyoyevning joriy yil 12- iyuldagi Oliy Majlis palatalari, siyosiy partiyalar hamda O‘zbekiston Ekologik harakati vakillari bilan videoselektor yig‘ilishi yakunlari har tomonlama ko‘rib chiqildi, siyosiy partiyalar oldiga qo‘yilgan vazifalarning so‘zsiz ijrosini ta’minlash bo‘yicha O‘zLiDePning ustuvor vazifalari belgilab olindi.

Majlis ishtirokchilari asosiy e’tiborini partiya faoliyatini tanqidiy va chuqur tahlil qilish asosida O‘zLiDeP faoliyatini tubdan yangi bosqichga ko‘tarish, keng miqyosli islohotlarning oddiy ishtirokchisi va ko‘makchisidan ularning tashabbuskoriga, yangilanishlarning asosiy ijrochisiga aylanish masalalariga qaratishdi.

Shuningdek, tadbirda partiya faoliyatida mavjud muammolarni bartaraf qilish bo‘yicha chora-tadbirlar kompleksi ko‘rib chiqildi. Birinchi navbatda, 2017-2021 yillarda O‘zbekiston Respublikasini yanada rivojlantirish bo‘yicha Harakatlar strategiyasida belgilangan vazifalar ijrosini ta’minlashda faol va samarali ishtirok etish lozimligi alohida qayd etildi. Zero, ushbu strategik muhim hujjatni ro‘yobga chiqarish saylovoldi kampaniyasi davomida O‘zLiDeP tomonidan ko‘tarilgan dolzarb muammolarning amalda bartaraf etilishiga xizmat qiladi.

Majlisda O‘zLiDeP o‘z dasturiy maqsad va vazifalarini, mafkuraviy sohadagi ishlarini qayta ko‘rib chiqib, ularga zarur o‘zgartish va qo‘shimchalar kiritishi, bunda jahon tajribasini o‘rganishi prinsipial jihatdan muhim ekani alohida ta’kidlandi. O‘zLiDePning hududiy kengashlari partiya elektoratini o‘ylantirayotgan dolzarb muammolarni aniqlash va ularning amaliy yechimlarini izlash bo‘yicha ishlari qoniqarsizligi ko‘rsatib o‘tildi. Bunday kamchiliklarni zudlik bilan bartaraf qilishga qaratilgan tegishli taklif va tavsiyalar ishlab chiqildi. 

Shuningdek, majlisda O‘zLiDeP deputatlik korpusi, ayniqsa Qonunchilik palatasidagi partiya fraksiyasi faoliyatini yanada kuchaytirish masalasiga ham alohida e’tibor qaratildi. Partiya elektoratining tub manfaatlariga daxldor sohalar uchun mas’ul bo‘lgan vazirlik va idoralar faoliyati ustidan samarali parlament va deputatlik nazoratini amalga oshirish lozimligi ta’kidlandi.

Shuhrat Sharafutdinov, Oliy Majlis Qonunchilik palatasidagi O‘zLiDeP fraksiyasi a’zosi:

– Ishchanlik ruhida o‘tgan yig‘ilishda davlatimiz rahbarining tanqidiy-tahliliy ma’ruzasidan kelib chiqib, oldimizda turgan ustuvor vazifalarni belgilab oldik. Yo‘l qo‘ygan kamchiliklarimizni aniqlab oldik.

Xo‘sh, bu borada biz deputatlarning endigi vazifasi nimadan iborat bo‘lishi kerak? Hech mubolag‘asiz aytishim mumkinki, oldimizda turgan eng muhim ustuvor vazifalardan biri qonun loyihalarini parlamentda muhokama etish va qabul qilishda partiyaviy yondashuv va fraksiyamizning qat’iy pozitsiyasini tizimli ravishda ishlab chiqishni yo‘lga qo‘yishimiz lozim.

Qonunlarni qabul qilishda odamlarning munosabatini ularning ichida turib, ular bilan birga yurib o‘rganish, qonunlarimiz to‘laqonli bo‘lishini va kutilgan samarani berish maqsadida muhokamalarni mahalliy Kengash deputatlari bilan birgalikda eng chekka qishloqlarda tashkil etish mexanizmini yo‘lga qo‘yishimiz darkor. Ana shunda Prezidentimiz ta’kidlaganidek, qonunlar mukammal hayotiy kuchga ega bo‘ladi.

Yaqinda parlamentda muhokama qilinayotgan qonun loyihalarini keng aholi orasiga muhokama qilish, ulardan ko‘plab aniq taklif va fikr-mulohazalar olish maqsadida partiyaning ijtimoiy tarmoqdagi sahifasida “O‘zLiDeP muhokamaga chorlaydi” guruhida onlayn muloqot yo‘lga qo‘yilgani juda yaxshi samara berayapti. Fuqarolar biz bilan to‘g‘ridan-to‘g‘ri muloqotga kirishishi imkoniyatiga ega bo‘lishdi. Bu ham bugungi kunning, davlatimiz rahbarining biz deputatlar oldida qo‘yayotgan dolzarb vazifalaridan biri sanaladi.

Alisher Abdullayev, O‘zLiDeP Siyosiy Kengashi a’zosi:

– Bugungi yig‘ilish kun tartibiga kiritilgan masala nihoyatda dolzarb. Haqiqatdan ham hozirgi kunda faolligimiz susayib, o‘tkazayotgan tadbirlar elektoratimiz vakillarini zeriktirib qo‘yayotganligi va samaradorligi tushib ketganligini tan olishimiz kerak. Shu bois, partiya tomonidan o‘tkazilayotgan tadbirlarning sifat va samaradorligini oshirish birinchi galdagi vazifamizdir. Bugungi yig‘ilishdan kelib chiqib muhim vazifalarni belgilab oldik. Ustuvor vazifalar ijrosini ta’minlash maqsadida viloyatdagi barcha tuman va shaharlarni hududlarga taqsimlagan holda tadbirkorlar manzillari ro‘yxatini shakllantirish, hamkor tashkilotlar bilan birgalikda har bir tadbirkor bilan uchrashish va muammosini partiyaviy mexanizmlar orqali yechishga e’tibor qaratamiz. Har oyda ikki kun partiya apparatlaridagi barcha yo‘nalishlarda ishlaydigan xodimlarlarning bilim va malakasini oshirish maqsadida amaliy mashg‘ulotlar olib boradigan “O‘quv markazlari” muntazam faoliyat ko‘rsatishini amalga oshiramiz. 

Shuningdek, Siyosiy Kengash yig‘ilishida partiyaning yoshlar, ayniqsa uyushmagan yoshlar bilan ishlash, kadrlar zaxirasini shakllantirish bo‘yicha faoliyatini takomillashtirishga doir dolzarb masalalar ham atroflicha muhokama qilindi. Bu borada partiyaning Yoshlar bo‘limi faoliyatini yanada kuchaytirish bo‘yicha aniq takliflar bildirildi.

Siyosiy Kengash yig‘ilishida tashkiliy masala ham ko‘rib chiqildi va tegishli qarorlar qabul qilindi.

O‘zLiDeP Matbuot xizmati

FOTOLAVHALAR

O‘zLiDePning Facebook’dagi rasmiy sahifasi va Telegram’dagi kanaliga a’zo bo‘lib, so‘nggi yangiliklardan xabardor bo‘ling!