Ayni paytda “Navoiyazot” aksiyadorlik jamiyati hududida uchta yirik investitsion loyiha – Polivinilxlorid (PVX), kaustik soda va metanol ishlab chiqarish, Ammiak va karbamid ishlab chiqarish hamda Azot kislotasi ishlab chiqarish korxonalari qurilishi jadal sur’atda davom etmoqda.

Prezidentimiz Shavkat Mirziyoyev Navoiy viloyatiga tashrifi chog‘ida ana shu yirik ishlab chiqarish korxonalari qurilishi faoliyati bilan tanishib, bu yerda mehnat qiladigan tajribali muhandis va ishchi xodimlarni tayyorlashga alohida e’tibor qaratish zarurligini ta’kidladi.

Xo‘sh, yirik korxonalarda o‘rnatilgan so‘nggi rusumdagi kompyuterlashgan texnika va asbob-uskunalarni kim boshqaradi? Albatta, zamonaviy bilimlarni puxta egallagan yoshlar boshqaradi. Shu ma’noda davlatimiz rahbari tomonidan qo‘yilayotgan yuqoridagi vazifa O‘zLiDeP zimmasiga ham alohida mas’uliyat yuklaydi. Zero, davlatimiz rahbari tomonidan  Oliy Majlis palatalari, siyosiy partiyalar hamda O‘zbekiston Ekologik harakati vakillari bilan videoselektor yig‘ilishida “chet ellardagi yoshlar bilan ishlash masalasi haqida gapiradigan bo‘lsak, afsuski, Oliy Majlis palatalari ham, siyosiy partiyalar ham bu masalaning yaqiniga ham kelgani yo‘q” deya bu boradagi faoliyatimiz asosli tanqid qilingan va galdagi vazifalar belgilab berilgan edi.  

Shundan kelib chiqqan holda partiyamiz bir qator amaliy tashabbuslarni ilgari surib kelmoqda. O‘tgan davr mobaynida ijtimoiy tarmoqlar orqali xorijning nufuzli ta’lim darogohlarida tahsil olayotgan va mehnat qilayotgan yoshlar bilan doimiy muloqot o‘rnatildi.  Ular mamlakatimiz ijtimoiy-siyosiy hayotida yuz berayotgan o‘zgarishlar hamda yoshlar siyosati bo‘yicha olib borilayotgan yangicha islohotlar bilan tanishtirib borilmoqda.

Misol uchun yaqin kunlarda partiya “Yoshlar qanoti” tashabbusi bilan Malayziyaning nufuzli oliy ta’lim muassasalarida tahsil olayotgan hamda mehnat qilayotgan yurtimiz yoshlari bilan vedeokonferensiya shaklida onlayn muloqot o‘tkazish rejalashtirilmoqda. Ushbu videokonferensiyaga tegishli vazirlik va idoralar vakillari hamda yirik tadbirkorlik sub’ekti rahbarlari ham taklif etilgan.

Bundan ko‘zlangan maqsad, tadbirkorlar, davlat va jamoat tashkilotlari vakillari bilan xorijning nufuzli ta’lim muassasalarida o‘qiyotgan O‘zbekistonlik yoshlar o‘rtasida o‘zaro amaliy muloqot maydonini yaratish, ularni qiziqtirgan va o‘ylantirayotgan savollarga javob qaytarish hamda ularning Vatanga qaytishi uchun ishga joylashish va kasbiy moslashuvning qulay sharoitlari bilan tanishtirish, bu boradagi takliflarini o‘rganishdan iboratdir.

Bir so‘z bilan aytganda, partiyamiz dunyoning eng yaxshi oliy ta’lim muassasalarida tahsil olayotgan, jahonning eng rivojlangan mamlakatlarida yashab turib, nufuzli xalqaro tashkilotlarda yoki transmilliy kompaniyalarda ajoyib karera qilayotgan yoxud fan, tibbiyot, san’at va biznesda katta yutuqlarga erishayotgan yoshlarimiz salohiyatidan samarali foydalanish tarafdoridir.

Toir SALIMOV,

O‘zLiDeP “Yoshlar qanoti” faoli

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!