Joriy yilning 20 aprel kuni Prezidentimiz “Tadbirkorlik va shaharosozlik faoliyatini amalga oshirish uchun yer uchastkalarini doimiy foydalanishga berish tartibini tubdan takomillashtirish chora-tadbirlari to‘g‘risida”gi yangi qarorni imzoladi.

Qarorning eng katta yangiliklaridan biri 2018 yilning 1 iyulidan boshlab yer uchastkalarini doimiy foydalanishga berish elektron auksion orqali amalga oshiriladigan bo‘ldi.

Xo‘sh, ushbu tizim o‘zi bilan qanday qulayliklarni olib keladi? Avvalo shuni aytish kerakki, “E-IJRO AUKSION” yagona elektron savdo maydonchasi shaffof tizim bo‘lib, u noqonuniy savdo va korrupsiyaning oldini olishga xizmat qiladi. Mazkur tizim yer uchastkalarini berish bo‘yicha materiallarni ko‘rib chiqish va kelishishda axborot-kommunikatsiya texnologiyalari imkoniyatlaridan to‘liq foydalanish imkonini taqdim etadi. Buning natijasida yer uchastkalari savdoga qo‘yilganligi to‘g‘risidagi axborotdan faqatgina tor doiradagi xaridorlar emas, balki ko‘pchilikning xabardor bo‘lishini ta’minlaydi. Ya’ni ilgarigidek, auksionda ishtirok etuvchi xaridorlarning soni sun’iy ravishda cheklanmaydi. Umuman olganda butun jarayon «inson omili» istisno etilgan holda faqat elektron shaklda amalga oshiriladi.

Aytish joizki, davlatimiz rahbari tashabbusi bilan hayotga tatbiq etilayotgan mazkur yangilik tadbirkorlarning naqdini ham vaqtini tejaydi. Endi ular o‘tirgan joylaridan uchun o‘zlariga qulay vaqtda hech qanday byurokratik to‘siqlarsiz onlayn tarzda yer sotib olib biznes boshlashlariga hech qanday monelik yo‘q.

Akbar MUZAFFAROV,

O`zLiDeP Siyosiy Kengashi Ijroiya

qo‘mitasi sektor mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!