27 oktyabr kuni Oliy Majlis Qonunchilik palatasi va Xalq deputatlari mahalliy Kengashlarga bo‘lib o‘tadigan saylovlarga tayyorgarlik qizg‘in pallaga kirib bormoqda. Markaziy Saylov komissiyasi O‘zLiDePga saylovlarda ishtirok etish uchun ijozat bergandan so‘ng, joylarda partiya saylovoldi dasturi loyihasi muhokamasi boshlandi.

Partiyaning saylovoldi dasturi loyihasi muhokamasiga bag‘ishlangan dastlabki yig‘ilish Chirchiq shahridagi “Maksam Chirchiq” AJ zavodida partiya rahbari Aktam Xaitov, deputatlar, ishbilarmonlar, zavod ishchilari va aholi vakillari ishtirokida tashkil qilindi.

Ta’kidlanganidek, partiya joriy yilgi saylovlarga “Va’da emas, natija, ertaga emas, bugun”, degan shior bilan kirib kelmoqda. O‘zLiDeP bu yilgi saylovoldi dasturida tadbirkorlar, ishbilarmonlar, fermerlar, fan-ta’lim, tibbiyot va ishchi-xodimlar manfaatlarini himoya qilishga jiddiy e’tibor qaratgan. “5 maqsad – 500 vazifa” shiori ostida o‘tgan saylovoldi dasturi muhokamasida O‘zLiDeP keyingi 5 yillikda maqsad vazifalari, xalqchil g‘oyalari haqida so‘z yuritildi. Xususan, aholimiz farovon hayot kechirishi, farzandlarimiz sifatli ta’lim va tibbiyotdan bahramand bo‘lishi, ayollarimiz va nuroniylarimiz, jamiki yurtdoshlarimiz baxtli yashashi, xalqimiz dasturxoni to‘kin bo‘lishi hamda ertangi kunimiz yorug‘ bo‘lishi uchun partiya o‘z oldiga aniq maqsadlarni qo‘ygan. Muloqotda partiya maktabgacha ta’lim tashkilotlari va umumiy o‘rta ta’lim muassasalari pedagog xodimlarining o‘rtacha ish haqini 2 barobar oshirish, umumiy o‘rta ta’lim maktablarida 153 mingdan ortiq sinf rahbarlari uchun to‘lanadigan mablag‘ miqdorini ko‘paytirishni taklif qilayotgani ta’kidlandi.

Shuningdek, Yangi O‘zbekistonni yuksak madaniyat va ma’naviyatga ega bo‘lgan, erkin, baxtli insonlar yashaydigan mamlakatga aylantirish uchun partiya butun kuch va imkoniyatlarini safarbar etishi, “Yangi O‘zbekiston – ma’rifatli jamiyat” konsepsiyasi va uni amalga oshirish bo‘yicha milliy dasturni ishlab chiqish bo‘yicha aniq reja-dasturga ega ekani urg‘ulandi. Shuningdek, maosh oluvchi fuqarolarni mehnatga haq to‘lashning eng kam miqdorini 3 barobarigacha bo‘lgan qismini daromad solig‘idan ozod etish, elektr energiyasi va tabiiy gaz iste’moli bo‘yicha belgilangan ijtimoiy normalar miqdorlarini mavsumiylik, xonadon a’zolarining ijtimoiy himoya reyestriga kiritilganligi va oilalar sonidan kelib chiqib, qayta ko‘rib chiqish, energiya ta’minoti sohasidagi moliyaviy hisobotlarda shaffoflik va ochiqlikni ta’minlash kabi yo‘nalishlarda o‘z oldiga qo‘ygan maqsadlari haqida batafsil ma’lumotlar berildi.

Yig‘ilish qatnashchilari ilm ahli va ijodkor ziyolilarga doimiy e’tibor qaratish, ularni moddiy va ma’naviy jihatdan qo‘llab-quvvatlash, mehnat va yashash sharoitlarini, shuningdek, madaniyat va sport muassasalari, kutubxonalar, teatr va muzeylarning moddiy-texnik bazasini yanada yaxshilash yuzasidan taklif-mulohazalarini bildirishdi. Shuningdek, muhokama ishtirokchilari fuqarolarni maqbul uy-joy bilan ta’minlash maqsadida har bir oila o‘z uyiga ega bo‘lishi kerakligini ta’kidlab, mazkur yo‘nalishni ham O‘zLiDePning saylovoldi dasturiga kiritishni tavsiya qilishdi.