Ijtimoiy tarmoqlarda Jizzaxlik tadbirkor Qashqadaryodan Jizzaxga o‘ziga tegishli bo‘lgan 60 tonna chigitni olib chiqishda taqiqqa uchraganligi borasidagi xabarlar tarqaldi. Tadbirkorning ma’lum qilishicha, chigit yuklangan yuk mashinasi viloyat hokimligining og‘zaki buyrug‘i bilan 5 kundan beri «Umakay» YPX maskanida ushlab turilibdi.

Ushbu hodisa partiyamiz faollari va deputatlarimiz tomonidan qo‘shimcha ravishda o‘rganilmoqda.

Ayni paytda masalaning dolzarbligidan kelib chiqqan holda O’zbekiston Liberal-demokratik partiyasi mazkur vaziyatga o‘z rasmiy munosabatini bildirishni lozim deb biladi.

O’zbekiston Respublikasi Konstitutsiyasining 67-moddasida O’zbekiston Respublikasi hududida iqtisodiy makon birligi, tovarlar, xizmatlar, mehnat resurslari va moliyaviy mablag‘larning erkin harakatlanishi kafolatlanishi aniq belgilab qo‘yilgan.

Shunday ekan, Konstitutsiya va qonunlarga asoslanmasdan na ichki ishlar xodimlarining, na hokimiyat vakillarining tovarlarning erkin harakatlanishini cheklashga hech qanday vakolati yo‘q.

Bu borada Oliy Majlis Qonunchilik palatasidagi partiya fraksiyasi a’zolari tomonidan Ichki ishlar vazirligi va Qashqadaryo viloyati hokimiyatiga tegishli deputatlik so‘rovlari yuborildi.